ABŞ prezidenti Donald Tramp bildirir ki, onunla Vladimir Putin arasında görüşün yaxın iki həftə ərzində baş tutması ehtimalı var.

Bu barədə ABŞ prezidenti Ağ Evdə bildirib. Onun dediyinə görə, prezidentlərin görüşündən əvvəl hər iki ölkənin xarici işlər nazirləri Marko Rubio və Sergey Lavrov görüşəcək.

Bununla yanaşı, Tramp Volodimir Zelenski ilə görüşü zamanı Putinlə telefon danışığından bir neçə məsələni müzakirə edəcəyini bildirib.

“Problemimiz var, onlar bir-biri ilə yaxşı yola getmirlər. Aralarında dəhşətli münasibət var”, – Tramp bildirib.

Tramp həmçinin etiraf edib ki, Rusiya prezidenti Putinlə şəxsi münasibətinə görə Rusiya-Ukrayna münaqişəsinin daha asan həll olunacağını düşünürdü. ABŞ prezidenti həmçinin qeyd edib ki, Ukraynaya uzaqmənzilli “Tomahawk” raketlərinin verilməsi perspektivinə daha təmkinli yanaşır.

“Bizə Birləşmiş Ştatlar üçün də Tomahawks lazımdır – bizdə çoxdur, amma yenə də ehtiyacımız var. Biz onların qıtlığını yarada bilmərik. Bu barədə nə edə biləcəyimizi bilmirəm”, – Tramp bildirib.