Dmitro Kuleba – Ukrayna BMT üzvlərini Rusiyanı daimi üzvlük statusundan məhrum etməyə və onu BMT-dən çıxarmağa çağırır

Ukraynanın xarici işlər naziri Dmitro Kuleba Rusiyanın BMT Təhlükəsizlik Şurasında daimi üzvü statusunun qeyri-legitim olduğunu bildirir.

Kuleba 1991-ci ildə Sovet İttifaqı dağıldıqdan sonra Rusiya nümayəndə heyətinin Təhlükəsizlik Şurasında bu yeri zəbt etdiyini və beynəlxalq ictimaiyyətin isə buna göz yumduğunu bildirib.

“Ukrayna Birləşmiş Millətlər Təşkilatının üzvlərini BMT Təhlükəsizlik Şurasında Rusiya Federasiyasının legitimliyi ilə bağlı BMT Nizamnaməsindən istifadəni yeniləməyə, Rusiyanı bu statusdan məhrum etməyə və onu BMT-dən çıxarmağa çağırır” -deyə Kuleba açıqlayıb.

Dmitro Kuleba Rusiyanın BMT Təhlükəsizlik Şurasına üzv olmaq üçün heç vaxt lazımi hüquqi prosedurdan keçmədiyini bildirib. O bildirib ki, Rusiyanın hərəkətləri “sülhsevər dövlət konsepsiyası”na ziddir.

“Rusiyanın BMT-də qeyri-qanuni mövcudluğunun 30 illiyi müharibələr və digər ölkələrin ərazilərini ələ keçirmək, beynəlxalq səviyyədə tanınmış sərhədləri zorla dəyişdirmək və işğalçılıq və neoimperiya ambisiyalarını təmin etməyə çalışmaqla yadda qalıb” -deyə Kuleba açıqlayır.