DİN – 2025-ci ilin yanvar-iyun ayları dövründə qeydə alınmış cinayətlərin sayı azalıb

15:09, 01.08.2025

Daxili İşlər Nazirliyinin rəsmi veb səhifəsində 2025-ci ilin ilk 6 ayı ərzində ölkə miqyasında qeydə alınmış cinayət statistikası dərc edilib. Statistikaya görə, 2024-cü ilin analoji dövrü ilə müqayisədə cinayətlərin sayı 795 faktla (-2,96%) azalıb.

Bununla yanaşı, qeydə alınmış cinayətlərin açılma göstəricisi artıb və 66,16 faiz təşkil edir.

Ölkədə narkotik vasitələrin qanunsuz dövriyyəsi və yayılmasına qarşı aparılan effektiv hüquqi siyasət və Daxili İşlər Nazirliyinin prinsipial mübarizəsi nəticəsində 2025-ci ilin iki rübündə narkotik cinayətlərinin aşkar edilməsi əhəmiyyətli dərəcədə artıb. Cari ilin altı ayında hüquq-mühafizə orqanları tərəfindən ümumilikdə 3919 narkotik cinayəti faktı aşkarlanıb ki, bu da əvvəlki ilin eyni dövrü ilə müqayisədə 29%-lə çoxdur. Polis tərəfindən aparılan aktiv tədbirlər nəticəsində 2025-ci ilin iki rübündə narkotik vasitələrin qanunsuz satışı ittihamı ilə 263 şəxs məsuliyyətə cəlb olunub ki, bu da əvvəlki ilin eyni dövrü ilə müqayisədə təxminən iki dəfə çoxdur.

2025-ci ilin 6 ayında həmçinin mülkiyyət əleyhinə törədilən cinayətlərin sayı azalıb. O cümlədən, mənzil oğurluğu, quldurluq, dələduzluq, hədə-qorxu ilə tələb etmə və mənimsəmə/israf etmə halları azalıb. 2025-ci ildə, həmçinin, əvvəlki ilin eyni dövrü ilə müqayisədə cinsi cinayətlər, insan alveri, yetkinlik yaşına çatmayanların alveri faktları, kibercinayət (-80 fakt) və məmur cinayətləri (-46 fakt) daha azdır.

Cari ilin ilk iki rübündə qəsdən sağlamlığa ağır xəsarət yetirmə faktları və nəqliyyat cinayətlərinin sayı, o cümlədən nəqliyyatın hərəkətinin təhlükəsizliyi və istismarı qaydasının pozulması halları 175 fakt artmışdır. Lakin, bununla yanaşı, cinayətlərin açılma göstəricisi artıb.

Ölkədə təhlükəsiz mühitin maksimum dərəcədə təmin edilməsi məqsədilə Daxili İşlər Nazirliyinin bütün müvafiq bölməsi 24 saatlıq rejimdə cinayətkarlığa qarşı barışmaz mübarizəni davam etdirir.

Məlumatı Daxili İşlər Nazirliyi yayır.

Müəllif - Nino Pashayeva

Hüquq