Gürcüstanın Daxili İşlər Nazirliyində Mütəşəkkil Cinayətkarlıqla Mübarizə üzrə İdarələrarası Koordinasiya Şurasının altıncı iclası keçirilib. Görüşdə daxili işlər nazirinin müavini Aleksandre Daraxvelidze rəhbərlik edirdi. Bu barədə Daxili İşlər Nazirliyi məlumat yayır.

Qurumun məlumatına görə, iclas çərçivəsində şura üzvləri ölkədə mütəşəkkil cinayətkarlıqla mübarizə sahəsində mövcud vəziyyəti, həmçinin dövlət qurumlarının bu kateqoriyadan olan cinayətlərə qarşı mübarizə istiqamətində həyata keçirdiyi tədbirləri və əldə olunan nəticələri müzakirə ediblər.

“Tərəflər Koordinasiya Şurası çərçivəsində mövcud işçi qruplarının fəal iştirakı ilə hazırlanmış sənədləri, xüsusən də 2025-2028-ci illər üçün Mütəşəkkil Cinayətkarlıqla Mübarizə üzrə Milli Strategiya və 2025-2026-cı illər üçün Fəaliyyət Planını dəstəkləyiblər və bu sənədlər yaxın vaxtlarda təsdiq olunmaq üçün Gürcüstan hökumətinə təqdim olunacaq.

Qurumlararası Koordinasiya Şurasının iclasında Gürcüstanın Baş prokurorunun müavini, maliyyə nazirinin müavini, təhsil, elm və gənclər nazirinin birinci müavini, ədliyyə nazirinin müavini, həmçinin Daxili İşlər Nazirliyinin və digər dövlət qurumlarının rəhbərləri iştirak edirdi”, – DİN-in yaydığı məlumatda deyilib.