Daxili İşlər Nazirliyinin Baş Müfəttişliyinin əməkdaşları narkotik vasitənin qanunsuz əldə edilməsi və saxlanması faktı üzrə 1995-ci il təvəllüdlü S.T.-nı saxlayıblar. Bu barədə Daxili İşlər Nazirliyi məlumat yayır.

Qurumun məlumatına görə, istintaqla müəyyən edilib ki, Daxili İşlər Nazirliyinin sərhəd polisi əməkdaşı S.T. qanunsuz olaraq külli miqdarda “Alfa-PVP” narkotik vasitəsi əldə edib və onu qanunsuz saxlayıb.

Hüquq-mühafizə orqanlarının əməkdaşları saxlanılan şəxsin şəxsi axtarışı zamanı narkotik vasitəni maddi sübut kimi götürüblər. İstintaq Gürcüstan Cinayət Məcəlləsinin 260-cı maddəsinin 2-ci hissəsi ilə aparılır, bu da 8 ilədək müddətə azadlıqdan məhrum etməni nəzərdə tutur.