Çexiya Xarici İşlər Nazirliyi Zurab Caparidzenin həbsi ilə bağlı narahatlığını ifadə edir və Gürcüstan hakimiyyətini demokratik dəyərləri qorumağa çağırır. Bu barədə agentliyin X sosial şəbəkəsində dərc etdiyi məlumatda deyilib.

“Biz Zurab Caparidzenin həbsi və onun məhkəməsinin qapalı şəkildə keçirilməsi ilə bağlı narahatlığımızı ifadə edirik. Biz Gürcüstan hakimiyyətini demokratik dəyərləri, qanunun aliliyini qorumağa, fundamental hüquq və azadlıqlara hörmət etməyə çağırırıq”, – Çexiya Xarici İşlər Nazirliyinin bəyanatında deyilib.

Məlumat üçün bildirək ki, mayın 22-də “Dəyişikliklər Naminə Koalisiyası”nın liderlərindən biri Zurab Qirçi Caparidze barəsində təyin edilmiş girov həbs qətimkan tədbiri ilə əvəz olundu. Müvəqqəti İstintaq Komissiyasının müraciəti əsasında Prokurorluq Caparidzeyə qarşı Cinayət Məcəlləsinin 349-cu maddəsi ilə ittiham irəli sürüb  ki, bu da “Gürcüstan Parlamentinin Müvəqqəti İstintaq Komissiyasının tələbinin yerinə yetirilməməsi” deməkdir və cərimə və ya bir ilədək azadlıqdan məhrum etmə, vəzifə tutmaq və ya fəaliyyət hüququndan üç ilədək məhrum etmə ilə cəzalandırılır.