Britaniyanın Xarici İşlər Nazirliyi İranın Londondakı səfiri Seyid Əli Musəvini çağırıb. Qurumun bəyanatına görə, bu addım Tehranın həm Böyük Britaniyada, həm də onun hüdudlarından kənarda “ehtiyatsız və sabitliyi pozan hərəkətləri” səbəbilə atılıb.

Böyük Britaniyanın Xarici İşlər, Birlik və İnkişaf Ofisi izah edir ki, bu, həmçinin İranla əlaqədə olmaqda şübhəli bilinən iki nəfərin həbsi ilə də bağlıdır.

Onlar kəşfiyyat xidmətlərinə yardım göstərməkdə və Britaniyanın ən qədim sinaqoqu da daxil olmaqla müxtəlif yerlərdə casusluq etməkdə ittiham olunurlar.

Bundan əvvəl Böyük Britaniyanın müdafiə naziri Con Hil İranın Hind okeanında yerləşən Dieqo Qarsiyadakı Britaniya-Amerika hərbi bazasına hücum etdiyini təsdiqlədi.