Birləşmiş Ərəb Əmirlikləri ABŞ və İsrailin İslam Respublikasına qarşı hərbi əməliyyata başlamasından sonra Fars körfəzi ölkələrini İrana qarşı koordinasiyalı hücuma qoşulmağa inandırmağa uğursuz cəhd göstərib, – bu barədə “Bloomberg” məlumat yayır.

Nəşrin məlumatına görə, Birləşmiş Ərəb Əmirliklərinin prezidenti Şeyx Məhəmməd bin Zayed regionun digər liderləri, o cümlədən Səudiyyə Ərəbistanının vəliəhd şahzadəsi Məhəmməd bin Salman ilə telefonla danışıb və kollektiv kampaniyaya başlamaq təşəbbüsünü səsləndirib, lakin həmkarları bundan imtina ediblər. Nəşrin yazdığına görə, Birləşmiş Ərəb Əmirliklərinin prezidenti bundan məyus olub.

Regional medianın qiymətləndirməsinə görə, bu cavab Birləşmiş Ərəb Əmirlikləri ilə Fars Körfəzinin digər ölkələri arasındakı son fikir ayrılıqlarını, o cümlədən ötən ay Birləşmiş Ərəb Əmirliklərinin “OPEK” kartelini tərk etmək barədə qəbul etdiyi qərarı izah edə bilər.

“Bloomberg” həmçinin xəbər verir ki, Səudiyyə Ərəbistanı mart ayında İrana zərbə endirib, lakin tezliklə Pakistanın rəhbərlik etdiyi vasitəçilik səylərini dəstəkləməyə keçib. Məqalədə deyilib ki, ABŞ Prezidenti Donald Tramp administrasiyasının Birləşmiş Ərəb Əmirliklərinin birgə hərbi reaksiya başlatmaq cəhdi barədə məlumatı var idi və bu təşəbbüsə Səudiyyə Ərəbistanı ilə Qətərin də qoşulmasını istəyirdi.