Berlində avtomobilin kütləyə çırpılması nəticəsində bir nəfər həlak olub, 16 nəfər isə xəsarət alıb

10:31, 26.07.2026

Berlində, Avropanın ən böyük prayd tədbirlərindən birində avtomobilin kütləyə çırpılması nəticəsində bir nəfər həlak olub, 16 nəfər isə xəsarət alıb. Hadisə şəhərin mərkəzi hissəsində, Tirqarten parkının yaxınlığında baş verib.

Berlin polisinin nümayəndəsinin bildirdiyinə görə, ilkin məlumata əsasən Berlində fəaliyyət göstərən islamçı dairələrlə əlaqəsi olan şübhəlinin şəxsiyyəti müəyyən edilib. Şübhəli şəxsin saxlanılması üçün digər federal torpaqlardan gələn polislər də daxil olmaqla, 2200-dən çox hüquq-mühafizə əməkdaşının cəlb olunduğu irimiqyaslı əməliyyat keçirilir.

Hadisədən sonra Tirqarten parkının ərazisi tamamilə bağlanıb. Polisin bildirdiyinə görə, sübutların ətraflı araşdırılması məqsədilə istintaq işləri davam etdiriləcək.

Hadisə yerinə gələn Berlin meri Kay Veqner bunun “azad və açıq cəmiyyətə qarşı bir hücum” olduğunu bəyan edib.

“Berlin azadlıq şəhəridir və bugün məhz bu azadlığa hücum olunub”, – deyə Veqner bildirib.

Baş vermiş hadisəni Almaniya kansleri Fridrix Merts də pisləyib. Onun sözlərinə görə, daxili işlər naziri ilə birlikdə cinayətin tam araşdırılması və günahkarların qanunun bütün ciddiliyi ilə cəzalandırılması üçün hər şeyi edəcək.

“Christopher Street Day” hər il yüz minlərlə insanın iştirak etdiyi Avropanın ən böyük LGBTQ+ Prayd tədbirlərindən biridir. Bu ilki paradın Brandenburq darvazası yaxınlığında planlaşdırılan konsertlə başa çatması nəzərdə tutulurdu, lakin hadisə səbəbindən təşkilatçılar tədbiri dayandırıb və vətəndaşları ərazini tərk etməyə çağırıblar.

Berlində “Christopher Street Day” ilk dəfə 1979-cu ildə keçirilib.