Gürcüstan hökumətinin məlumatına əsasən, 2025-ci ilin birinci rübünün göstəricilərinə görə, beynəlxalq səyahətlərdən əldə edilən gəlirlərin rekord səviyyəsi qeydə alınıb və tarixi maksimuma, 826 milyon ABŞ dollarına çatıb.

Baş nazir İrakli Kobaxidzenin bu gün parlamentin Bürosuna təqdim etdiyi illik hesabatında turizm sektorunda həyata keçirilən və planlaşdırılan layihələr barədə danışılır.

Sənəddə qeyd olunur ki, turizm sektorunun gücləndirilməsi və bu istiqamətdə ölkənin potensialından istifadəsi davam edir. Hökumətin izahatına görə, 2024-cü ilin birinci rübü ilə müqayisədə səyahət gəlirləri 18 301 394 (2,3%) ABŞ dolları artıb.

“2025-ci ilin birinci rübünün məlumatına görə, beynəlxalq turist səfərlərinin sayı 1 314 828 nəfər təşkil edib (2024-cü illə müqayisədə 1,1% artım). Beynəlxalq turist səfərləri üzrə rekord göstərici qeydə alınıb və 958 947 ziyarət təşkil edib ki, bu da 2024-cü illə müqayisədə 2,2% artım deməkdir,” – sənəddə deyilib.