Azərbaycan və Avropa İttifaqı yeni tərəfdaşlıq prioritetləri üzrə danışıqlara başlamaq barədə razılığa gəliblər, – bu barədə Azərbaycanın xarici işlər naziri Ceyhun Bayramov ilin yekunlarına həsr olunmuş mətbuat konfransında bildirib.

Azərbaycan xarici işlər nazirinin söylədiyinə görə, yeni sazişin imzalanması üçün danışıqların bərpası barədə də razılıq var.

Bayramov deyir ki, Azərbaycan ilə Avropa İttifaqı arasında əməkdaşlığın təşviqi sahəsində müsbət dinamika var.

Bununla yanaşı, Ceyhun Bayramov qeyd edib ki, son bir il ərzində Rusiya ilə münasibətlərdə ümumi gərginlik olub.

“Buna baxmayaraq, ölkələrimiz arasında əlaqələr davam edib. Düşənbədəki görüş münasibətlərin normallaşması baxımından səmərəli olub”, – deyə Ceyhun Bayramov bildirib.

Azərbaycanın xarici işlər naziri həmçinin Azərbaycan-Ermənistan sülh prosesində mühüm irəliləyişlərin əldə olunduğunu və bu istiqamətdə mühüm addımların atıldığını bildirib.

“Azərbaycan və Ermənistan arasında etimadın bərpası üçün səylər güclənib. Biz 2026-cı ildə sülh prosesini daha da irəli aparmaq üçün ikitərəfli dialoqa sadiq qalmaqda davam edəcəyik. Ermənistanın Azərbaycan ərazisi vasitəsilə taxıl göndərməsi və Ermənistan tərəfindən Azərbaycan neft məhsullarının alınması etimadın bərpası istiqamətində müsbət proseslərdir”, – deyə Ceyhun Bayramov bildirib.