Gürcüstanın daxili işlər naziri Qela Qeladze nümayəndə heyəti ilə birlikdə rəsmi səfərlə Azərbaycan Respublikasına gedib.

Səfər çərçivəsində nazir azərbaycanlı həmkarı Vilayət Eyvazov ilə görüş keçirib.

Gürcüstanın Daxili İşlər Nazirliyinin məlumatına görə, tərəflər iki ölkə arasında hüquq-mühafizə sahəsində mövcud tərəfdaşlığı və onun dərinləşdirilməsi perspektivlərini müzakirə ediblər.

Nazirliyin məlumatına görə, söhbət zamanı Cənubi Qafqaz regionunda təhlükəsizlik məsələləri, mütəşəkkil cinayətkarlıqla mübarizə, Gürcüstan və Azərbaycanın hüquq-mühafizə orqanları arasında əməkdaşlıq, polis attaşeləri institutunun gücləndirilməsinə də toxunulub.

Görüşün sonunda Qela Qeladze azərbaycanlı həmkarına səmərəli əməkdaşlığa görə təşəkkür edib və onu Gürcüstana dəvət edib.

Bununla yanaşı, Azərbaycan Respublikasına rəsmi səfəri çərçivəsində daxili işlər naziri nümayəndə heyəti ilə birlikdə Azərbaycanın ümummilli lideri Heydər Əliyevin və xanımı Zərifə xanım Əliyevanın xatirəsini ehtiramla yad edib.