Anri Oxanaşvili Dövlət Təhlükəsizlik Xidmətinin rəhbəri vəzifəsindən istefa verib. Bu barədə DTX-nin sosial şəbəkədə yaydığı Oxanaşvilinin bəyanatında qeyd edilib.

Bəyanatda qeyd edildiyi kimi, Oxanaşvili Gürcüstanın baş nazirinin milli təhlükəsizlik məsələləri üzrə müşaviri vəzifəsini icra edəcək.

“İctimaiyyətə bildirmək istəyirəm ki, hakim komanda ilə məsləhətləşmələrə əsasən, mən Gürcüstanın Dövlət Təhlükəsizlik Xidmətinin rəhbəri vəzifəsini tərk etmək və Gürcüstan Baş nazirinin Milli Təhlükəsizlik Məsələləri üzrə müşaviri vəzifəsini icra etmək qərarına gəldim.

2016-cı ildə səkkiz il parlament həyatında fəal iştirak etdiyim hakim komandaya qoşuldum, daha sonra ədliyyə naziri vəzifəsində fəaliyyətimi davam etdirdim. Dövlət xidmətindəki 9 illik fəaliyyətim olduqca zəhmətkeş və böyük məsuliyyətlə dolu idi. İşimdə atdığım hər addım dövlət maraqlarının qorunmasına əsaslanırdı. Sevinirəm ki, hakim komanda ilə birlikdə ölkəmizin milli maraqlarının qorunması və möhkəmləndirilməsi işinə öz töhfəmi vermişəm.

Bu müddət ərzində göstərdikləri etimada və dəstəyə görə hakim komandaya təşəkkür etmək istəyirəm. Siyasi fəaliyyətimdə göstərdiyi böyük etimada və daimi dəstəyə görə cənab Bidzina İvanişviliyə xüsusi təşəkkürümü bildirmək istəyirəm. Artıq bildirdiyim kimi, mən Gürcüstanın baş nazirinin milli təhlükəsizlik məsələləri üzrə müşaviri kimi fəaliyyətimi davam etdirəcəyəm. Bu fürsətə görə cənab İrakli Kobaxidzeyə böyük təşəkkürümü bildirirəm.

Eyni zamanda, mən Gürcüstanın Dövlət Təhlükəsizlik Xidmətinin xüsusi dəstəkçisi olaraq qalıram. Bu qısa müddət ərzində əhəmiyyətli birgə uğurlu fəaliyyətinə görə xidmətin şəxsi heyətinə böyük təşəkkürümü bildirirəm. Xidmətin gələcək rəhbərinə və xidmətin hər bir əməkdaşına uğurlar arzulayıram”, – Oxanaşvilinin bəyanatında qeyd edilib.