Andrey Babiş - Cari il Çexiyanın NATO-nun müdafiə xərcləri hədəfini yerinə yetirə bilməyəcəyi ehtimal olunur

18:47, 31.05.2026

Cari il Çexiya Respublikasının NATO-nun müdafiə xərcləri hədəfini yerinə yetirə bilməyəcəyi ehtimal olunur, – bu barədə Çexiyanın Baş naziri Andrey Babiş bildirib.

Çexiyanın Baş nazirinin qeyd etdiyinə görə, hökumət müdafiəyə ümumi daxili məhsulun (ÜDM) 2%-ni xərcləmək üçün əlindən gələni edəcək, lakin büdcə ilə bağlı problemlər bunu çətinləşdirir.

Onun sözlərinə görə, mövcud büdcə kəsiri əvvəlki, avropayönümlü hökumətin həddindən artıq xərclərinin nəticəsidir.

Babişin bəyanatına görə, Praqa NATO-nun yeni hədəfinə – 2035-ci il üçün müdafiəyə ÜDM-in 3,5%-ini xərcləmək öhdəliyinə sadiq qalır. Lakin onun fikrincə, alyans üzvləri təkcə xərc göstəricilərinə deyil, hərbi imkanların gücləndirilməsinə daha çox diqqət yetirməlidirlər.

“Əsas məsələ faizlər deyil, real imkanlardır, çünki xərc göstəriciləri ilə manipulyasiya etmək kifayət qədər asandır”, – Babiş bildirib.

Müəllif - Nino Pashayeva

Dünya