Anaklia layihəsinin direktoru Erik Beyts – Dibin dərinləşdirilməsini cari ilin dekabrına qədər bitirəcəyik

Dibin dərinləşdirilməsini cari ilin dekabrına qədər bitirəcəyik, – bu barədə Belçikanın “Jan De Nul” şirkətinin nümayəndəsi, Anaklia layihəsinin direktoru Erik Beyts Anaklia dərin dəniz limanının tikintisi ilə bağlı bildirib.

Onun sözlərinə görə, işlər qrafikə uyğun olaraq davam edir və ehtiyac yaranarsa, “Jan De Nul” işə əlavə texnika da cəlb edəcək.

“İşə donanmamızın ən yaxşı gəmiləri cəlb olunub və ehtiyac yarandığı təqdirdə, daha çoxunu da əlavə edəcəyik”, – deyə Erik Beyts qeyd edib.

Onun izah etdiyinə görə, hər iki gəmi – “Al-Idrisi” və “Tristao Da Cunha” – sutkada 70 min kubmetr qum sovurur.

“Dərinləşdirməni ilin sonuna qədər bitirəcəyik. Hava şəraiti bizə mane ola bilməz, bu gəmilər 3 metrlik dalğalarda belə işləmək qabiliyyətinə malikdir. Ukrayna və İrandakı müharibələr nəticəsində Orta Dəhlizin rəqibi olan şimal və cənub marşrutları tıxanıb. Anaklia limanı isə Orta Dəhlizin buraxılış qabiliyyətinə yeni bir təkan verəcək. O, Bosfor boğazından keçərək Qara dənizə daxil olan ən böyük gəmiləri qəbul edə biləcək. Mühəndislik baxımından Anaklia, Qara dənizin ən böyük limanı olan Konstansanı da geridə qoyacaq”, – deyə Erik Beyts bildirib.

“Jan De Nul” şirkətinin nümayəndəsi, Anaklia layihəsinin direktoru Erik Beyts vurğulayıb ki, Gürcüstan dəhlizi regionda sabitlik və təhlükəsizliyin əsas birləşdirici körpüsüdür.

“Ukrayna və ya İrandakı müharibələrin nə qədər tez başa çatmasından asılı olmayaraq, Gürcüstan dəhlizinin əhəmiyyəti getdikcə artacaq. Şimal və cənub marşrutları illər keçsə belə köhnə etimadı bərpa edə bilməyəcək, çünki risklər şüurlarda hər zaman qalacaq; əgər Gürcüstan sülh yolu ilə irəliləsə, favorit olaraq qalacaq”, – Erik Beyts bildirib.