ABŞ Ərəb dənizində İranın “kölgə donanmasına” aid bir gəmini saxlayıb. Bu gəmi xarici bazarlarda milyardlarla dollar dəyərində olan İran enerji resurslarının, neft və qaz məhsullarının, o cümlədən propan və butanın daşınması ilə əlaqələndirilir. Bu barədə ABŞ Mərkəzi Komandanlığı məlumat yayır.

Onların məlumatına görə, həmin gəmi ABŞ Maliyyə Nazirliyinin sanksiyalarına məruz qalmış “kölgə donanmasına” aid 19 gəmi arasındadır.

ABŞ Mərkəzi Komandanlığının bəyanatında qeyd olunur ki, gəmi “ABŞ hərbçilərinin göstərişlərinə əməl edir və müşayiət altında İrana doğru geri qayıdır”.

“ABŞ qüvvələri sanksiyaları tətbiq etməyə və İran limanlarına daxil olan və ya oradan çıxan gəmilərə qarşı blokadanı tam şəkildə həyata keçirməyə davam edir. Blokada başlayandan bəri 37 gəmi istiqamətini dəyişib”, – ABŞ Mərkəzi Komandanlığının bəyanatında deyilib.