ABŞ-ın Energetika Naziri Kris Rayt İranla müharibənin “növbəti bir neçə həftə ərzində” bitəcəyini gözlədiyini bildirir.

“Düşünürəm ki, bu münaqişə mütləq yaxın bir neçə həftə ərzində, bəlkə də daha tez başa çatacaq. Amma münaqişə bir neçə həftə ərzində başa çatacaq və sonra enerji təchizatının bərpa olunacağını və qiymətlərin aşağı düşəcəyini görəcəyik”, – deyə Kris Rayt “ABC News”a verdiyi müsahibədə bildirib.

Rayt bu şərhi neft qiymətlərinin artmağa davam etməsi və ABŞ-da yanacaq qiymətlərinin yüksəlməsi fonunda verib.

“Qısamüddətli dalğalanmaların olacağını, amerikalılar üçün qiymət artımlarına səbəb olacağını çox yaxşı bilirdik. Bu gün qiymətlər hələ də Bayden administrasiyası dövründə olduğundan daha aşağıdır, o dövrdə İrandan daha yaxşı davranması üçün yalvarırdılar, sövdələşirdilər və rüşvət verirdilər. Bayden administrasiyası dövründə benzin 5 dollar idi. Ümid edirik ki, bu dəfə bu həddə çatmayacağıq, amma hər halda, bu benzin qiymətlərinin artımı dünyada geosiyasi vəziyyəti əbədi olaraq dəyişdirəcək şey üçündür”, – deyə ABŞ-ın Energetika Naziri bildirib.