ABŞ Dövlət Departamenti – Donald Trampın administrasiyası dövründə 175 mindən çox viza ləğv edilib

ABŞ Dövlət Departamentinin məlumatına görə, Prezident Donald Trampın administrasiyası dövründə 175 mindən çox viza ləğv edilib.

Dövlət Departamentinin bəyanatında deyilib ki, viza şərtlərini pozan, cinayət törədən, amerikalıları aldadan, Ştatların immiqrasiya sistemindən sui-istifadə edən və ya ölkənin milli təhlükəsizliyinə təhdid yaradan şəxslərin vizaları ləğv edilib.

Bununla yanaşı, ABŞ Dövlət Departamentinin izahatına görə, sərxoş vəziyyətdə avtomobil idarə etmək, oğurluq, narkotik cinayətləri, cinsi zorakılıq, uşağa qarşı zorakılıq və dələduzluq kimi cinayətlər törətmiş şəxslərin vizaları ləğv edilib.

Rəsmi məlumata əsasən, ABŞ-dan siyasi əsaslarla bir neçə şəxs də deportasiyaya məruz qalıb.

“Dövlət katibi Marko Rubio müəyyən edib ki, bir çox xarici ölkə vətəndaşı xarici siyasət əsasları ilə deportasiya olunub; onların arasında Kuba kommunist rejiminin təsir əməliyyatı ilə əlaqəli olan Kuba vətəndaşı, İran rejimi ilə əlaqələri olan İran vətəndaşları, Minnesota qubernatoru Tim Vals tərəfindən əfv edilmiş yetkinlik yaşına çatmayanlara qarşı cinsi cinayət törətmiş Laos vətəndaşı və Amerika Birləşmiş Ştatlarının prezidentinə qarşı zorakılığı müdafiə edən, amerikalıları öz “düşmənləri” adlandıran Küveyt vətəndaşı var”, – bəyanatda deyilib.

Departamentin bildirdiyinə görə, Prezident Tramp və katib Rubionun rəhbərliyi altında onlar Amerika xalqının təhlükəsizliyinə təhdid yaradan xarici ölkə vətəndaşlarının vizalarını müəyyənləşdirməyə, araşdırmağa və ləğv etməyə davam edəcəklər.

“ABŞ vizası bir imtiyazdır, hüquq deyil. Departament vizadan sui-istifadə edənlərdən cəmiyyətimizi qorumaq üçün mövcud olan bütün vasitələrdən istifadə etmək öhdəliyinə sadiq qalmaqda davam edir”, – deyə bəyanatda deyilib.