Donald Trampın administrasiyası Venesuelanın müvəqqəti prezidenti Delsi Rodrigesdən Rusiyanı, Çini, İranı və Kubanı ölkədən “çıxarmasını”, həmçinin onlarla iqtisadi əlaqələri kəsməsini tələb edib. Bu barədə “ABC News” xəbər verir.

Ağ Evin mənbələrinin bildirdiyinə görə, Venesuela neft hasilatı sahəsində yalnız ABŞ ilə əməkdaşlığa razılaşmalı və neftin satışında ABŞ-a üstünlük verməlidir.

“ABC News”un yazdığına görə, Tramp administrasiyasının planına əsasən, Venesuela hakimiyyəti bu tələbləri yerinə yetirməlidir ki, ona neft hasilatını artırmağa icazə verilsin.

ABŞ-ın dövlət katibi Marko Rubio yanvarın 5-də Konqres üzvləri ilə keçirilən qapalı brifinqdə bildirib ki, Vaşinqton Venesuelanı bu addımları atmağa məcbur edə bilər, çünki onun neft tankerləri artıq doludur. Dövlət katibinin sözlərinə görə, Karakasın neft ehtiyatlarını satmadan maliyyə baxımından müflis vəziyyətə düşməsinə cəmi bir neçə həftə qalıb.

Bununla yanaşı, Donald Tramp sosial şəbəkədə yazıb ki, Venesuelanın müvəqqəti hakimiyyəti ABŞ-a sanksiyalara məruz qalmış 30–50 milyon barrel nefti təhvil verəcək.

“Bu neft bazar qiyməti ilə satılacaq və mən, Amerika Birləşmiş Ştatlarının prezidenti kimi, bu vəsaitə nəzarət edəcəyəm ki, onun Venesuela və ABŞ xalqının rifahı naminə istifadə olunmasına əmin olum,” — Tramp bildirib.