Abastumani dolama yolunun tikintisi davam edir, layihə çərçivəsində biomüxtəlifliyin qorunması məqsədilə heyvanlar üçün xüsusi miqrasiya keçidləri təşkil olunacaq
Gürcüstanın Regional İnkişaf və İnfrastruktur Nazirliyinin Avtomobil Yolları Departamentinin məlumatına görə, Abastumaninin 15.9 kilometrlik dolama yolunun tikintisi davam edir.
Avtomobil Yolları Departamentinin məlumatına görə, yeni yolun əsas məqsədi tranzit avtonəqliyyatın bilavasitə Abastumani qəsəbəsindən keçməməsini təmin etməkdir ki, bu da kurortun nəqliyyat yükünü azaldacaq, ekoloji vəziyyətin yaxşılaşdırılmasına və onun unikal təbii mühitinin qorunub saxlanılmasına kömək edəcəkdir.
Dolanbac yolun tikintisi mürəkkəb geoloji və relyef şəraitində həyata keçirilir. İşlərə qayalıq qruntların emalı, qazma işləri, yamacların sabitləşdirilməsi və yolun hərəkət hissəsinin genişləndirilməsi daxildir. Yolun dayanıqlığını və təhlükəsizliyini təmin etmək üçün istinad divarları, suötürücü borular və drenaj kanalları tikilir.
Layihə çərçivəsində artıq 368 metrlik yol tuneli çəkilib. Ümumilikdə 6 yeni körpünün inşası nəzərdə tutulub. Onlardan Abastumani çayı üzərindəki 3 körpünün əsas tikinti işləri başa çatıb və yalnız asfalt-beton örtüyünün döşənməsi qalıb, qalan 3 körpünün tikintisinə isə yaxın vaxtlarda başlanılacaq. Dolanbac yolun tikintisi prosesində təbii mühitə təsirin azaldılmasına və zədələnmiş təbii örtüyün bərpasına xüsusi diqqət yetirilir. İşlərlə paralel olaraq, yol tikintisinin təsirinə məruz qalmış ərazilərdə meşə və ağac-kol bitkilərinin bərpasına başlanılacaq. Avtomobil Yolları Departamenti qanunvericiliklə nəzərdə tutulmuş müvafiq kompensasiya vəsaitlərini Qorunan Ərazilər Agentliyinə artıq ödəyib. Bununla yanaşı, agentliklə razılaşdırılaraq əlavə kompensasiya məqsədli ağacəkmə işləri də planlaşdırılıb. Ekspertlər artıq Abastumani dolama yolu ərazisində əkiləcək bitki növlərini və sayını müəyyən edəcək müvafiq plan üzərində işləyirlər.
Yerli biomüxtəlifliyin qorunması məqsədilə, layihə çərçivəsində müvafiq tədbirlər, o cümlədən heyvan növləri üçün xüsusi miqrasiya keçidlərinin qurulması da nəzərdə tutulub.
Avtomobil Yolları Departamenti yol istismara verildikdən sonra da ətraf mühitin bərpası və yaşıllaşdırılması tədbirlərini davam etdirəcək ki, yolun ətrafındakı ərazidə təbii mühit maksimum dərəcədə qorunub saxlanılsın və bərpa edilsin.
Abastumani dolama yolunun tikintisi ilə paralel olaraq, kurort istiqamətində digər yol layihələri də davam edir — Kutaisi–Bağdati–Abastumani–Benara yolunun müəyyən hissələrinin reabilitasiyası, həmçinin Abastumani qəsəbəsində Asatiani küçəsinin yol infrastrukturunun yenilənməsi. Layihələr dövlət büdcəsindən maliyyələşdirilir”, – Avtomobil Yolları Departamentinin yaydığı məlumatda deyilib.