Ətraf Mühitin Mühafizəsi üzrə Məlumat və Təhsil Mərkəzi ilə “AIS” peşə kolleci arasında əməkdaşlıq memorandumu imzalanıb, bu da peşə təhsili və ətraf mühit istiqamətlərinin inkişafı prosesində mühüm addım hesab olunur, – Ətraf Mühitin Mühafizəsi üzrə Məlumat və Təhsil Mərkəzi məlumat yayır.

Mərkəzin məlumatına görə, memorandum tərəflər arasında əməkdaşlığın dərinləşdirilməsini və birgə fəaliyyətlərin təşviq edilməsini nəzərdə tutur.

“Əməkdaşlıq kənd təsərrüfatı və ətraf mühit sahələrində təhsil və praktiki imkanların inkişafına, müasir standartların tətbiqinə və tələb olunan peşələrin populyarlaşdırılmasına yönələcək.

Tələbələrin nəzəri biliklərinin təcrübə ilə effektiv şəkildə əlaqələndirilməsinə xüsusi diqqət yetiriləcək ki, bu da onların peşəkar bacarıqlarının gücləndirilməsinə və məşğulluq imkanlarının artırılmasına töhfə verəcək.

Əməkdaşlıq çərçivəsində birgə təhsil, informasiya və praktik layihələrin həyata keçirilməsi, təlimlərin, seminarların və işgüzar görüşlərin təşkili, həmçinin həm yerli, həm də beynəlxalq səviyyədə təcrübə mübadiləsinin aparılması planlaşdırılıb.

Bu təşəbbüs ətraf mühitlə bağlı maarifləndirmənin artırılmasına, ekoloji cəhətdən məsuliyyətli yanaşmaların tətbiqinə və davamlı inkişaf prinsiplərinin gücləndirilməsinə töhfə verəcək”, – məlumatda qeyd edilib.