Ուկրաինայում ասում են, որ Բախմուտի ուղղությամբ զինվորների պակաս ունեն
Ուկրաինայում ասում են, որ Բախմուտի ուղղությամբ զինվորների պակաս ունեն, իսկ դա ավելի մեծ խնդիր է, քան զինամթերքի պակասը։ Այս մասին «Ազատություն» ռադիոկայանի եթերում հայտնել է 5-րդ առանձին մարտական բրիգադի երկրորդ գումարտակի հրամանատարի տեղակալ Ալեքսեյ Տարասենկոն։
«Սա միայն դեֆիցիտ չէ, դա կրիտիկական դեֆիցիտ է։ Մարդկանց պակասը խնդիր է Ուկրաինայի զինված ուժերի համար: Նույնիսկ ավելի մեծ խնդիր, քան զինամթերքի պակասը»,- ասում է Տարասենկոն։
Նրա խոսքով, Բախմուտի ուղղությամբ զինվորների պակասը հնարավոր չէ պատշաճ կերպով լրացնել: Ուստի, ըստ նրա, լրացուցիչ մոբիլիզացիա է սպասվում, և դա առաջին հերթին կազդի երիտասարդ տղամարդկանց վրա։
Ավելի վաղ Ուկրաինայի պաշտպանության նախարար Ռուստամ Ումերովը հայտարարել էր, որ հաջորդ տարի Ուկրաինան ցանկանում է արտերկրից բանակ զորակոչել տղամարդկանց։