Ուկրաինայի և Ռուսաստանի միջև փոխզիջումների վերաբերյալ վերջնական որոշումը կկայացվի Ուկրաինայում անվտանգության երաշխիքների, ինչպես նաև ժամանակավորապես օկուպացված տարածքների՝ Դոնբասի և Ղրիմի հարցով համընդհանուր հանրաքվեի ժամանակ,- ասել է Ուկրաինայի նախագահ Վլադիմիր Զելենսկին՝ Ուկրաինայի հանրային հեռարձակողի հետ հարցազրույցում:

«Պատասխանը շատ պարզ է: Մենք արդեն ամեն ինչ հասկանում ենք։ Մեզ չեն ընդունում ՆԱՏՕ, քանի որ վախենում են Ռուսաստանից: Այսքանը: Պետք է հանգստանանք, ասենք՝ «լավ, անվտանգության այլ երաշխիքներ»։ Կան ՆԱՏՕ-ի երկրներ, որոնք ցանկանում են դառնալ անվտանգության երաշխավոր, որոնք, ցավոք, չեն կարող ապահովել մեր 100%-անոց անդամակցությունը Դաշինքին, բայց պատրաստ են անել այն ամենը, ինչ պետք է աներ ՆԱՏՕ-ն, եթե մենք Դաշինքի անդամ լինեինք։ Կարծում եմ՝ սա նորմալ փոխզիջում է»,- ասել է Զելենսկին։

Զելենսկու խոսքով՝ անվտանգության երաշխիքների հարցերը կքննարկվեն սահմանադրական փոփոխություններում և Ուկրաինայի օրենսդրության փոփոխություններում։

«Բոլոր բանակցային խմբերին բացատրում էի՝ երբ խոսում եք այս փոփոխությունների մասին, դրանք կարող են պատմական լինել, մենք ոչ մի տեղ չենք գնում, գնում ենք հանրաքվեի։ Մարդիկ պետք է ասեն և պատասխանեն փոխզիջումների այս կամ այն ​​ձևաչափին։ Իսկ թե ինչպիսին կլինեն՝ սա արդեն մեր խոսակցության ու Ուկրաինայի ու Ռուսաստանի փոխըմբռնման խնդիրն է։ Ուստի, ամեն դեպքում, ես պատրաստ եմ գնալ ամեն ինչի, եթե իմ քայլը կլինի ժողովրդի հետ»,- ասել է Վլադիմիր Զելենսկին։