Վլադիմիր Զելենսկի. Ուկրաինան պետք է կարողանա օգտագործել ռուսական ակտիվները սեփական զենք արտադրելու, ինչպես նաև եվրոպական և ամերիկյան զենք գնելու համար
Ուկրաինայի նախագահ Վլադիմիր Զելենսկին Բրյուսելում՝ Եվրոպական միության գագաթնաժողովի շրջանակում անցկացված մամուլի ասուլիսում հայտարարել է, որ Ուկրաինան պետք է կարողանա օգտագործել ռուսական սառեցված ակտիվները սեփական սպառազինության արտադրության, ինչպես նաև եվրոպական ու ամերիկյան զինատեսակների գնման համար։
Զելենսկու խոսքով՝ սառեցված ռուսական ակտիվների օգտագործումը Ռուսաստանի վրա ճնշում գործադրելու միջոցներից մեկն է, և հենց դրանից է Մոսկվան վախենում։
«Իմ դիրքորոշումն է հետևյալը․ նախ և առաջ, ցանկացած տեսակի ռուսական գումար պետք է օգտագործվի ուկրաինական արտադրության համար։ Սա ավելի էժան և արագ ճանապարհ է։ Խոսքը գնում է հեռահար զենքերի, դրոնների, էլեկտրոնային պատերազմի համակարգերի և հրթիռների մասին», – նշել է Զելենսկին։
Նրա խոսքով՝ այս միջոցներն Ուկրաինային անհրաժեշտ են արդեն հաջորդ տարվա սկզբին։ Նա նաև նշել է, որ այս հարցի շուրջ այսօր կայացած երկխոսությունը հեշտ չի եղել։
«Դիալոգը հեշտ չէր, բայց շատ արդյունավետ էր։ Մենք սպասում ենք որոշումներին այս հարցի շուրջ։ Դա օգտակար կլինի ոչ միայն Ուկրաինայի, այլ նաև ամբողջ Եվրոպայի համար։ Ինչպես նախկինում ասել եմ, մենք պատրաստ ենք ֆինանսավորել կամ կիրառել այդ միջոցները եվրոպացիների հետ միասին՝ Եվրոպան ուժեղացնելու համար», – ասել է նա։
Զելենսկին նաև նշել է, որ պատրաստ է խաղաղ բանակցություններին, եթե Մոսկվան նույնպես պատրաստակամություն դրսևորի։
«Նախ պետք է դադարեցվի կրակը։ Եթե Ռուսաստանը պատրաստ է խոսելու, ապա մենք նույնպես պատրաստ ենք։ Խաղաղության պլանը սկսվում է նստելիս և խոսելու պատրաստակամությամբ, այլ ոչ թե կանգնած վիճակում մարտ վարելու ցանկությամբ ու ցանկացած տեսակի հրթիռ օգտագործելով՝ խաղաղ բնակչության դեմ», – ընդգծել է նա։
Նա կրկին շեշտել է, որ որևէ տարածքի «փոխանակում» տեղի չի ունենա, քանի որ դա Ուկրաինայի ինքնիշխանության հարցն է։
«Սա չէ փոխանակում, երբ դու քո սեփական տարածքը փոխանակում ես նույն տարածքի հետ։ Սա պարզապես ինչ-որ մեկի ցանկությունն է։ Այսինքն՝ ռուսները չեն ստանա լրացուցիչ հող, եթե մենք հեռանանք մեր հողից։ Դա ոչ թե փոխանակում է, այլ ինչ-որ խելահեղություն։ Չգիտեմ՝ դա ինչ է։ Ամեն դեպքում, մենք չենք ճանաչում որևէ տեսակի փոխանակում մեր տարածքների շուրջ։ Սա վերաբերում է մեր ինքնիշխանությանը, և դա անընդունելի է», – ասել է Զելենսկին։
Բրյուսելում կայացած ԵՄ գագաթնաժողովի շրջանակում Զելենսկին հանդիպում է ունեցել Լեհաստանի վարչապետ Դոնալդ Տուսկի հետ։ Ինչպես նա նշել է X սոցիալական ցանցում, նրանք քննարկել են համատեղ նախագծեր, Ուկրաինայի ռազմական աջակցության հարցը և Ռուսաստանի կողմից Ուկրաինայի էներգետիկ ենթակառուցվածքների դեմ հարձակումները։
Նա նաև հանդիպել է Ֆրանսիայի նախագահ Էմանուել Մակրոնի և Գերմանիայի կանցլեր Ֆրիդրիխ Մերցի հետ՝ հայտնելով, որ Ուկրաինան այժմ սպասում է եվրոպական երկրներից հեռահար հրթիռների, այդ թվում՝ «Թոմահավկների» մատակարարմանը։
