Վլադիմիր Զելենսկի. Ռուսաստանը աշխարհը կանգնեցրեց ռադիացիոն աղետի եզրին
Ռուսաստանը աշխարհը կանգնեցրել է ռադիացիոն աղետի շեմին, ասել է Ուկրաինայի նախագահ Վլադիմիր Զելենսկին ՄԱԿ-ի Անվտանգության խորհրդի արտակարգ նիստում տեսաուղերձում։ Արտահերթ նիստը կայացել է վեց երկրների՝ Ալբանիայի, ԱՄՆ-ի, Մեծ Բրիտանիայի, Ֆրանսիայի, Իռլանդիայի և Նորվեգիայի խնդրանքով ուկրաինական պատերազմի սկսվելուց վեց ամիս անց։
Զելենսկու խոսքով՝ «ռուս զինվորականները Եվրոպայի ամենամեծ ատոմակայանի տարածքը վերածել են մարտական գոտու»։
Նախագահի խոսքով՝ Ատոմային էներգիայի միջազգային գործակալությունը պետք է ստանձնի կայանի մշտական հսկողությունը, իսկ Ռուսաստանը պետք է անվերապահորեն դադարեցնի միջուկային շանտաժը և հեռանա կայանի տարածքից։
Զելենսկին իր ելույթում նաև ընդգծել է աշխարհում Ռուսաստանի ագրեսիայի և էներգետիկ ճգնաժամի հետևանքով առաջացած «արհեստական սովը»։
ՄԱԿ-ի գլխավոր քարտուղար Անտոնիո Գուտիերեշի խոսքով՝ «այս անիմաստ պատերազմի հետեւանքները զգացվում են Ուկրաինայի սահմաններից դուրս»։ Գլխավոր քարտուղարը մտահոգություն է հայտնել Զապորոժյեի ատոմակայանի շուրջ ստեղծված իրավիճակի կապակցությամբ։
Նշենք, որ Ռուսաստանը դեմ էր նիստին Զելենսկու մասնակցությանը տեսաուղերձի տեսքով։