ԱԳՆ. ԵԽԽՎ-ի բանաձևը չի հիմնվում օբյեկտիվ, փաստերի վրա հիմնված գնահատականի վրա, պարունակում է միտումնավոր մեկնաբանություններ, միակողմանի քաղաքական գնահատականներ և Վրաստանի մասին կեղծ նարատիվների կրկնություն
Զեկույցը չի հիմնվում օբյեկտիվ և փաստերի վրա հիմնված գնահատականի վրա, պարունակում է միտումնավոր մեկնաբանություններ, միակողմանի քաղաքական գնահատականներ և Վրաստանի մասին կեղծ նարատիվների կրկնություն, ինչը լուրջ հարցեր է առաջացնում ինչպես զեկույցի անկողմնակալության, այնպես էլ դրա պատրաստման գործընթացի վերաբերյալ. այս մասին նշված է Վրաստանի արտաքին գործերի նախարարության հայտարարության մեջ։ Գերատեսչությունն արձագանքում է Եվրոպայի խորհրդի խորհրդարանական վեհաժողովի բանաձևին։
Ինչպես նշված է արտաքին գործերի նախարարության հայտարարության մեջ, Վրաստանը ևս մեկ անգամ հաստատում է իր պատրաստակամությունը հարգանքի և վստահության վրա հիմնված փոխշահավետ համագործակցության համար և Եվրոպայի խորհրդի ինստիտուտների կողմից ակնկալում է կառուցողական ու արդար մոտեցում։
«Եվրոպայի խորհրդի խորհրդարանական վեհաժողովը (ԵԽԽՎ) հունիսի 24-ին ընդունել է բանաձև, որը հիմնված է Վրաստանում ժողովրդավարական ինստիտուտների գործառնության մասին պատրաստված զեկույցի վրա։
Նշված զեկույցը չի հիմնվում օբյեկտիվ և փաստերի վրա հիմնված գնահատականի վրա, պարունակում է միտումնավոր մեկնաբանություններ, միակողմանի քաղաքական գնահատականներ և Վրաստանի մասին կեղծ նարատիվների կրկնություն, ինչը լուրջ հարցեր է առաջացնում ինչպես զեկույցի անկողմնակալության, այնպես էլ դրա պատրաստման գործընթացի վերաբերյալ։
Առանձնապես տագնապալի է, որ մարդու իրավունքների, ժողովրդավարության և օրենքի գերակայության պաշտպանության նպատակով ստեղծված միջազգային ինստիտուտն ավելի ու ավելի հաճախ է օգտագործվում որպես քաղաքական ճնշման գործիք։ Նման պրակտիկան վնասում է հենց Եվրոպայի խորհրդի հեղինակությանը և հիմնավոր կասկածներ է առաջացնում կազմակերպության առանձին կառույցների անկողմնակալության նկատմամբ։
Անընդունելի է ժողովրդավարության անունից ժողովրդավարական ճանապարհով ընտրված իշխանության վարկաբեկման փորձը, օրինականորեն գործող պետական ինստիտուտների միտումնավոր քննադատությունը և այն քաղաքական խմբերի խրախուսումը, որոնք փորձում են անտեսել ընտրությունների միջոցով ստացված հանրային մանդատը։ Նման մոտեցումը ծառայում է ոչ թե ժողովրդավարության ամրապնդմանը, այլ քաղաքական բևեռացման խորացմանն ու ռադիկալ գործընթացների խրախուսմանը։
Անթույլատրելի է սուվերեն պետության ներքին քաղաքական և իրավական գործընթացների նկատմամբ կողմնակալ վերաբերմունքը, ինչպես նաև ազգային շահերի հաշվառմամբ ու սահմանադրական ընթացակարգերի լիարժեք պահպանմամբ ընդունված օրենսդրական որոշումների գնահատումը քաղաքական հատկանիշներով։ Մտահոգիչ է օրենքների չեղարկման պահանջը՝ առանց պատշաճ իրավական արգումենտացիայի և օբյեկտիվ գնահատման, ինչը դուրս է գալիս ինստիտուցիոնալ մանդատի շրջանակներից և կրում է քաղաքական միջամտության նշաններ։
Վրաստանի իշխանությունը հաստատակամորեն կպաշտպանի երկրի ինքնիշխանությունը, սահմանադրական կարգն ու վրացի ժողովրդի ժողովրդավարական ընտրությունը։ Ոչ մի արտաքին քաղաքական ճնշում, ապատեղեկատվական արշավ կամ անարդար գնահատական չի կարող հիմք դառնալ Վրաստանի ազգային շահերի, պետական անկախության և ժողովրդավարական լեգիտիմության անտեսման համար։
Վրաստանը, որպես Եվրոպայի խորհրդի պատասխանատու անդամ և նրա գլխավոր արժեքների հավատարիմ պաշտպան, ևս մեկ անգամ հաստատում է իր պատրաստակամությունը հարգանքի և վստահության վրա հիմնված փոխշահավետ համագործակցության համար և Եվրոպայի խորհրդի ինստիտուտների կողմից ակնկալում է կոնստրուկտիվ ու արդար մոտեցում»,- նշված է Վրաստանի արտաքին գործերի նախարարության հայտարարության մեջ։