Սպիտակ տան խոսնակ. Ջո Բայդենը չի ծրագրում որոշումներ կայացնել, որոնք կարող են հանգեցնել Վաշինգտոնի և Մոսկվայի միջև ուղիղ ռազմական առճակատման
ԱՄՆ նախագահ Ջո Բայդենը չի պլանավորում որոշումներ կայացնել, որոնք կարող են հանգեցնել Վաշինգտոնի և Մոսկվայի միջև ուղիղ ռազմական առճակատման, – ասել է ԱՄՆ նախագահի վարչակազմի հաղորդակցության գծով տնօրեն Քեյթ Բեդինգֆիլդը:
Սպիտակ տան ներկայացուցիչը հայտնել է, որ երբ նախագահը որոշում է, թե ինչ ուղարկել Ուկրաինա, հաշվի է առնում երկու գործոն.
Ըստ Բեդինգֆիլդի, առաջինը ռազմական գնահատականներն են, թե որն է ամենաարդյունավետն ու ձեռնտու Ուկրաինայի զինված ուժերին:
Նրա մեկնաբանմամբ, երկրորդ գործոնն այն է, որ Բայդենը «չի ձգտում ուղիղ հակամարտության ԱՄՆ զինվորականների և Ռուսաստանի զինված ուժերի միջև»։
Միաժամանակ Սպիտակ տան ներկայացուցիչն ընդգծել է, որ «Ուկրաինային ԱՄՆ ռազմական օգնության ծավալն ու մասշտաբն աննախադեպ է»։
«Մենք մշտական քննարկումների մեջ ենք Ուկրաինայի հետ, թե ինչպես օգնել նրանց պաշտպանել իրենց ինքնիշխանությունն ու անվտանգությունը, սակայն անվտանգության երաշխիքների մասին կոնկրետ մանրամասներ չկան, որոնց մասին ես կարող եմ խոսել այս պահին»,- ասել է Քեյթ Բեդինգֆիլդը։