Գովելի է, որ «Գախարիա Վրաստանի համար» կուսակցության անդամները ներկա են լիագումար նիստերի դահլիճում և սկսել են իրականացնել պատգամավորական իրենց լիազորությունները։ Այս մասին հայտարարել է Վրաստանի խորհրդարանի նախագահ Շալվա Պապուաշվիլին խորհրդարանի լիագումար նիստի ընթացքում։

Պապուաշվիլիի խոսքով՝ չնայած ուշացմանը, մի քաղաքական խումբ՝ կուսակցություն, ընդունել է ժողովրդի կամքն ու ժողովրդավարությունը։

«Այսօր խորհրդարանի անդամները՝ «Գախարիա Վրաստանի համար» կուսակցության անդամները, ներկա են լիագումար նիստերի դահլիճում և սկսել են կատարել պատգամավորական իրենց լիազորությունները, ինչը կարևոր և ողջունելի է։ Սա այն դասն է, որը տարբեր կազմերի Վրաստանի խորհրդարանը բազմաթիվ անգամներ անցել է։ 2016-ին եղել են ընտրությունների արդյունքների չճանաչելու փորձեր, սակայն վերջում բոլորին ստիպված եղել է ընդունել արդյունքները, ժողովրդի կամքը և սկսել խորհրդարանական աշխատանքը։ 2020-ին նույնպես տեսանք փորձեր չճանաչելու ընտրությունների արդյունքները։ Ոմանց մեկ տարի, ոմանց՝ կես տարի պահանջվեց հասկանալու համար, որ ժողովրդի կամքից հնարավոր չէ փախչել, և վերջում սկսեցին իրականացնել իրենց պատգամավորական լիազորությունները։ 2024-ին ևս մենք տեսանք նույն փորձերը՝ շրջանցելու իրականությունը և ժողովրդի կամքը։

Գովելի է, որ, չնայած ուշացմանը՝ մեկ տարի անց, մի քաղաքական խումբ՝ կուսակցություն, ընդունեց ժողովրդի կամքը, ժողովրդավարությունը և սկսեց իրականացնել պատգամավորական լիազորությունները։ Ցավալի է, որ որոշ կուսակցություններ այրեցին բոլոր հետդարձի կամուրջները, և գուցե այսօր շատ են ուզում լինել խորհրդարանում, սակայն այդ հնարավորությունը զրկեցին իրենց իսկ ընտրողներին՝ թույլ չտալով, որ նրանց ձայնը հնչի խորհրդարանում։

Ողջունում եմ մեր գործընկերներին։ Ձեզ հետ միասին, փաստաթղթերի մեջ ներառված է նաև պատգամավորական երդումը, որի կատարումը մեկ տարով ուշացրել եք, սակայն ավելի լավ է ուշ, քան երբեք, ուստի խնդրում եմ ստորագրել երդումը և փոխանցել կազմակերպչական և իրավական հարցերի վարչություններին, որպեսզի այն պահվի խորհրդարանում», – հայտարարել է Պապուաշվիլին։

Հիշեցնենք, որ «Գախարիա Վրաստանի համար» կուսակցության անդամներն այսօր այցելել են խորհրդարան։ Հոկտեմբերի 20-ին կուսակցությունը հայտարարել էր խորհրդարան մտնելու որոշման մասին։ Կուսակցությունում նշել էին, որ խորհրդարանի և տեղական ինքնակառավարման մարմինների ամբիոնները չօգտագործելը ոչ միայն սխալ է, այլև հանցագործություն երկրի և ժողովրդի առջև։

Ավելին, հոկտեմբերի 26-ին կուսակցության քաղաքական խորհրդի անդամ Ռուսուդան Թևզաձեն հայտարարել էր, որ հրաժարվում է խորհրդարանական մանդատից և լքում կուսակցությունը։