Ես հավատում եմ, որ 2025 թվականը կլինի չարի նկատմամբ բարու հաղթանակի տարի, հասարակության միավորման տարի,- ասված է Վրաստանի նախագահ Միխեիլ Ղավելաշվիլիի ամանորյա շնորհավորանքում։

Ղավելաշվիլիի խոսքով՝ ապագա միասնությունը պետք է հիմնված լինի սիրո և փոխադարձ հարգանքի վրա։

«Իմ սիրելի Վրաստանի քաղաքացիներ, շնորհավոր Նոր տարի: Մաղթում եմ ձեզ խաղաղություն, երջանկություն և ուրախություն: Առանձնահատուկ սիրով ուզում եմ շնորհավորել մեր երեխաներին։ Մաղթում եմ, որ այսօրվա կախարդական Ամանորը լինի նրանց երազանքների ու ցանկությունների իրականացման սկիզբը։

Թող սերը, ջերմությունն ու ուրախությունը 2025 թվականին ներթափանցեն յուրաքանչյուրիս ընտանիք։ Առանձնահատուկ ջերմությամբ և սիրով ցանկանում եմ շնորհավորել մեր աբխազ և օսյան եղբայրների և քույրերի Նոր տարին։ Թող Ամանորի ուրախությունը լինի մեր ընդհանուր, երջանիկ ապագայի ավետաբերը։

Կարծում եմ, որ սա կլինի չարի դեմ բարու հաղթանակի, մեր հասարակությունը համախմբելու և հզորացնելու տարի: Մեր հայրենիքի շուրջ հասարակության միասնությունը պետք է օրինակ լինի քաղաքական գործիչների համար, որպեսզի նրանք նույնպես կարողանան ընդհանուր լեզու գտնել մեր երկրի ավելի լավ ապագայի համար։

Մեր ապագա միասնությունը պետք է հիմնենք սիրո և փոխադարձ հարգանքի վրա։ Այնպիսի անձնուրաց սիրո վրա, ինչպես վրացի տատիկներն ու պապիկները սիրում են իրենց թոռներին, և հարգանքի վրա, որը դրսևորվում է ավանդական վրացական ընտանիքում տատիկ-պապիկի նկատմամբ վերաբերմունքով։

Թող 2025 թվականը լինի վրացիների մեծ սիրո և միասնության տարի։

Թող սիրո զորությունը հաղթի բոլոր գայթակղություններին, որոնք կարող են պառակտել և հանել մեզ իրար դեմ:

Եվս մեկ անգամ շնորհավորում եմ ձեզ Ամանորի կապակցությամբ, թող Աստված մեզ պահապան լինի»,- ասում է Միխեիլ Ղավելաշվիլին։