Վրաստանի վարչապետ Իրակլի Կոբախիձեն սոցցանցերում գրել է Վրաստանում Չինաստանի դեսպանի հետ հանդիպման մասին։

Ինչպես նշում է Կոբախիձեն, դեսպանի հետ հանդիպմանը քննարկվել են տարբեր հարցեր, այդ թվում՝ երկու երկրների համագործակցության ամրապնդման հարցը։

«Ես հանդիպել եմ Վրաստանում Չինաստանի Ժողովրդական Հանրապետության արտակարգ և լիազոր դեսպան Ճոու Ցիենի հետ։ Հանդիպմանը ես ևս մեկ անգամ իմ ցավակցությունն եմ հայտնել դեսպանին Չինաստանում տեղի ունեցած ավերիչ երկրաշարժի համար, որը բազմաթիվ կյանքեր խլեց, իսկ վիրավորներին մաղթեցի շուտափույթ ապաքինում։ Զրույցն անդրադարձել է Վրաստանի և Չինաստանի ռազմավարական գործընկերության համաձայնագրով նախատեսված ոլորտներում համագործակցությանը և առևտրատնտեսական կապերի զարգացման դրական դինամիկային։ Նշվել է, որ ազատ առևտրի համաձայնագիրը և առանց վիզայի ճանապարհորդությունը, ինչպես նաև մարդկանց միջև կապերը լավ հնարավորություն են երկկողմ հարաբերությունների հետագա զարգացման համար։ Մենք հաստատեցինք մեր պատրաստակամությունն էլ ավելի ամրապնդելու արդյունքի վրա հիմնված համագործակցությունը»,- գրել է Իրակլի Կոբախիձեն։