Իրակլի Ղարիբաշվիլին հանդիպել է Միացյալ Թագավորության արտաքին գործերի նախարար Ջեյմս Քլևերլիի հետ
Վրաստանի վարչապետ Իրակլի Ղարիբաշվիլին հանդիպել է Միացյալ Թագավորության արտաքին, համադաշնության և զարգացման հարցերով պետքարտուղար Ջեյմս Քլևերլիի հետ։ Տեղեկությունը տարածում է Վրաստանի կառավարության վարչակազմը։
Կառավարության վարչակազմում կայացած հանդիպմանն ընդգծվել է Վրաստանի և Միացյալ Թագավորության միջև ռազմավարական գործընկերությունը և քաղաքական երկխոսության բարձր մակարդակը։ Ինչպես նշել է Իրակլի Ղարիբաշվիլին, Ջեյմս Քլևերլիի այցը Վրաստան ընդգծում է երկու երկրների հարաբերությունների դրական դինամիկան։
Հանդիպմանը քննարկվել է Վրաստանի և Միացյալ Թագավորության միջև «Ուորդրոպի ռազմավարական երկխոսությունը», որն ընդգրկում է երկու երկրների համագործակցության ողջ սպեկտրը և ավելի ամրապնդում ռազմավարական գործընկերությունն ու համագործակցության համաձայնագիրը։ Ընդգծվել է տարբեր ոլորտներում համագործակցության ներուժի լիարժեք յուրացման կարևորությունը։
Կառավարության ղեկավարը շնորհակալություն է հայտնել Ջեյմս Քլևերլիին Վրաստանի ինքնիշխանությանն ու տարածքային ամբողջականությանը ցուցաբերած անմնացորդ աջակցության, ինչպես նաև պետական ինստիտուտների ամրապնդման և ժողովրդավարության զարգացման գործում ունեցած ավանդի համար։
Քննարկված հարցերի թվում էին անվտանգության միջավայրն ու մարտահրավերները տարածաշրջանում և աշխարհում։ Ընդգծվել է Վրաստանի կարեւոր դերը սեւծովյան տարածաշրջանի անվտանգության ամրապնդման գործում։
Տեղեկությունը տարածում է Վրաստանի կառավարության վարչակազմը։