Ես կցանկանայի խնդրել ձեզ պատվաստվել, քանի որ մենք ունենք Առողջապահության համաշխարհային կազմակերպության կողմից լիազորագրված պատվաստանյութեր, մեզանից զգալիորեն ավելի հարուստ երկրներ չեն կարողացել ներկրել լավագույն պատվաստանյութեր,- այս մասին հայտարարել է Վրաստանի վարչապետ Իրակլի Ղարիբաշվիլին Բոլնիսիում՝ «Վրացական երազանքի» Բոլնիսիի քաղաքապետի թեկնածու Դավիթ Շերազադիշվիլիի առաջադրմանը խոսքով ելույթ ունենալիս:

Կառավարության ղեկավարը նշել է, որ իր ընտանիքի բոլոր անդամները պատվաստվել են, և այս առումով ոչ մի վտանգ չկա:

«Համաճարակի պատճառով ես կցանկանայի խնդրել ձեզ պատվաստվել: Անձամբ ես պատվաստվել եմ: Ծնողներս, իմ ընտանիքի բոլոր անդամները պատվաստված են: Այս առումով վտանգ չկա: Շատ կեղծ տեղեկություններ են տարածվում: Ես կխնդրեի թեկնածուին և բոլորին՝ մեծամասնականներին, ունենալ ավելի շատ տեղեկատվություն, ավելի շատ շփում բնակչության հետ: Բացատրենք, որ դա բացարձակապես անվտանգ է: Ընկերներ, կառավարությունը պատվաստանյութ է ներկրել, շատ երկրներ մեզանից շատ ավելի ուժեղ վիճակում են, շատ ավելի հարուստ, բայց նրանք չեն կարողացել ներկրել լավագույն պատվաստանյութերը: Մենք ունենք աշխարհի լավագույն պատվաստանյութերը, որոնք ճանաչվել են Առողջապահության համաշխարհային կազմակերպության կողմից, լիազորված պատվաստանյութեր – «Pfizer»-ի միլիոն ու կես պատվաստանյութ, ունենք նաև չինական ավանդական մեթոդներով պատրաստված միլիոն ու կես դեղաչափ պատվաստանյութ: Հետևաբար, համաճարակը հաղթելու, տնտեսությունը խթանելու և չխոչընդոտելու միակ միջոցը մեզ համար շատ պարզ բան է՝ պատվաստելը: Կրկնեմ, հիմնական փաստարկն այն է, որ բացառվում է պատվաստված անձի մահը: Հետևաբար, մենք պետք է պաշտպանենք մեր բնակչությանը, ընտանիքի անդամներին, ընկերներին, հարազատներին և դրանով իսկ շարունակենք հզոր ներդրում ունենալ երկրի զարգացման գործում: Սա պետք է լինի մեր հիմնական մտահոգությունը», – ասել է Իրակլի Ղարիբաշվիլին: