Հայաստանի քաղաքացիական բնակչության անվտանգության դեմ ագրեսիվ գործողությունները կստանան համարժեք պատասխան,- այս մասին հայտարարել է Հայաստանի Հանրապետության արտաքին գործերի նախարարության մամուլի քարտուղար Աննա Նաղդալյանը:

Հայաստանի արտգործնախարարության ներկայացուցչի հայտարարությունը տարածում է  «Պանորամա Ամ» գործակալությունը:

«Ադրբեջանական կողմը շարունակում է իր ագրեսիվ գործողությունները հայ-ադրբեջանական սահմանին, դիտավորյալ կրակ է բացում  քաղաքացիական ենթակառուցվածքների, քաղաքացիական անձանց վրա և ընդլայնում է լարվածության աշխարհագրությունը»,- ասված է Հայաստանի ԱԳՆ խոսնակի հայտարարության մեջ:

Ըստ Հայաստանի արտաքին գործերի նախարարության, այսօր Բերդ քաղաքում քաղաքացիական ենթակառուցվածքների վրա հարվածներ են իրականացվել անօդաչու թռչող սարքերով:

«Հայաստանի Հանրապետության քաղաքացիական բնակչության անվտանգության դեմ ուղղված այս ագրեսիվ գործողությունները կստանան համարժեք պատասխան, որի համար ադրբեջանական կողմը պատասխանատվություն է կրելու», – ասված է Հայաստանի արտգործնախարարության հայտարարության մեջ: