«Ֆայնենշլ Թայմս». Եվրոպայում գազի գները բարձրացել են տարեկան կտրվածքով ամենաբարձր մակարդակի

Գազի գները Եվրոպայում բարձրացել են տարվա կտրվածքով ամենաբարձր մակարդակի։ Դրա պատճառը Ռուսաստանից բնական գազի մատակարարման հնարավոր դեֆիցիտն է։

Տեղեկությունը տարածում է «Ֆայնենշլ Թայմս»-ը։

Եվրոպայի հենանիշային Title Transfer Facility (TTF) ինդեքսը հինգշաբթի առավոտյան աճել է ավելի քան 5%-ով՝ հասնելով 46 եվրոյի մեկ մեգավատ ժամի դիմաց, ինչը ամենաբարձր գինն է անցյալ տարվա նոյեմբերի վերջից ի վեր:

Կտրուկ աճը տեղի է ունեցել այն բանից հետո, երբ ավստրիական OMV ընկերությունը հայտարարություն է տարածել՝ նախազգուշացնելով «Ռուսաստանից գազի մատակարարումների հնարավոր կրճատման մասին»: Ընկերությունն այս հայտարարությունը տարածել է այն բանից հետո, երբ շահել է ռուսական «Գազպրոմի» հետ վեճը, և արբիտրաժային դատարանը պարտավորեցրել է ռուսական ընկերությանը վճարել 230 մլն եվրո։

Ավստրիական OMV-ում հայտարարել են, որ այդ գումարը պետք է պահանջել «Գազպրոմի» հետ գործող պայմանագրի հիման վրա։ Սա կարող է հանգեցնել երկու ընկերությունների միջև գործարար հարաբերությունների վատթարացման։