Բաքվում մեկնարկել են «Հավերժություն-2026» Ադրբեջան-Վրաստան-Թուրքիա զորավարժությունները
Բաքվում մեկնարկել են Ադրբեջան-Վրաստան-Թուրքիա «Հավերժություն-2026» զորավարժությունները: Նոյեմբերի 12-ին տեղի է ունեցել համակարգչային հրամանատարաշտաբային զորավարժությունների բացման արարողությունը, որին մասնակցել են Ադրբեջանի, Վրաստանի և Թուրքիայի ներկայացուցիչները։
Ըստ Ադրբեջանի պաշտպանության նախարարության՝ Ազգային պաշտպանության համալսարանի Ռազմական կառավարման ինստիտուտի Ռազմական խաղերի կենտրոնում անցկացվող զորավարժությունները անցկացվում են ադրբեջանական բանակի զինծառայողների, Ադրբեջանի երկաթուղիների անվտանգության վարչության և ռազմավարական օբյեկտների պաշտպանության պետական գործակալության աշխատակիցների հետ միասին։
Սկզբում մեկ րոպե լռությամբ հարգվել է երեք երկրների ազատության համար իրենց կյանքը զոհաբերածների հիշատակը: Հնչել են Ադրբեջանի, Վրաստանի և Թուրքիայի պետական օրհներգերը։
Բացման արարողության ժամանակ ելույթ ունենալով՝ գեներալ-մայոր Վուգար Ալիվերդիևը միջոցառման մասնակիցներին փոխանցել է Ադրբեջանի Հանրապետության պաշտպանության նախարար, գեներալ-գնդապետ Զաքիր Հասանովի ողջույնները և մաղթել նրանց հաջողություններ իրենց առջև դրված խնդիրների կատարման գործում: Նա նշել է, որ զորավարժություններին մասնակցում են երեք երկրներից ավելի քան 200 զինծառայողներ։
Նշվել է, որ պարբերաբար անցկացվող զորավարժությունների նպատակն է բարելավել համատեղ գործողությունների համակարգումը տարածաշրջանային տնտեսական նախագծերի և ռազմավարական օբյեկտների պաշտպանության առումով, ինչպես նաև զարգացնել մասնակիցների գործառնական և վերլուծական հմտությունները բնական պաշարների տեղափոխման անվտանգության ապահովման գործընթացում: Համակարգչային հրամանատարաշտաբային զորավարժությունները, որոնք մեծ նշանակություն են տալիս փոխգործակցության ընդլայնմանը և փորձի փոխանակմանը, կշարունակվեն մինչև նոյեմբերի 20-ը: