Արտաքին գործերի նախարար Ջեյմս Քլեվերլիի այցը Մոլդովա և Վրաստան նպատակ ունի նոր աջակցություն ցուցաբերել նրանց շեմին սպառնացող վտանգի դեմ,- նշված է բրիտանական կառավարության տարածած պաշտոնական հայտարարության մեջ։

Ըստ բրիտանական կառավարության՝ Ջեյմս Քլեվերլին կհայտարարի նոր ֆինանսական օգնության մասին՝ Ռուսաստանի չարորակ միջամտության դեմ տարածաշրջանային դիմակայունությունը բարձրացնելու համար: Մեծ Բրիտանիայի ԱԳՆ-ից հայտնել են, որ Ջեյմս Քլեվերլին նոր ֆինանսավորում կներկայացնի Վրաստանին հաջորդ տարվա ընտրությունների անվտանգությունն ամրապնդելու համար։

Ըստ բրիտանական կառավարության՝ Մեծ Բրիտանիայի արտգործնախարարը կհաստատի, որ Միացյալ Թագավորությունը կանգնած է Մոլդովայի և Վրաստանի ժողովրդի կողքին և պաշտպանում է նրանց ժողովրդավարական ընտրությունը՝ հանուն ազատության, անկախության և ինքնիշխանության։

«Քչերն են ավելի լավ հասկանում Ռուսաստանի չարամիտ գաղտնի մարտավարությունը, քան Մոլդովան ու Վրաստանը։ Մեծ Բրիտանիան մի կողմ չի կանգնի այնքան ժամանակ, քանի դեռ Մոսկվան ակնհայտորեն չի խարխլել նրանց ժողովրդավարությունը, ինքնիշխանությունը և տարածքային ամբողջականությունը։ Մենք պետք է կառուցենք նրանց դիմադրողականությունը Ռուսաստանի հիբրիդային սպառնալիքների դեմ, պաշտպանենք նրանց ժողովրդի ժողովրդավարական ընտրությունները և պաշտպանենք նրանց դռան շեմին սպառնալիքներից»,- այցից առաջ ասել է Ջեյմս Քլեվերլին։

Ըստ բրիտանական կառավարության՝ երկու երկրներն էլ խոցելի են, քանի որ բախվում են Կրեմլի հիբրիդային ագրեսիայի մարտավարությանը և տարածաշրջանում ռուսական վերահսկողությունն ընդլայնելու փորձերին, ընդ որում արտգործնախարարը հաստատել է Մեծ Բրիտանիայի անսասան հանձնառությունը պաշտպանելու իրենց տարածքային ամբողջականությունն ու ինքնիշխանությունը:

Բրիտանական կառավարության հայտարարության մեջ նշվում է, որ Վրաստանում Ջեյմս Քլեվերլին կտեսնի, թե ինչպես է Միացյալ Թագավորության համագործակցությունն օգնում դիմակայել ռուսական դիվերսիոն միջամտությանը, ներառյալ պաշտպանության և կիբերանվտանգության ոլորտում համագործակցությունը: Վրաստանում ժողովրդավարության ամրապնդման նպատակով Մեծ Բրիտանիան տրամադրում է նաև 500,000 ֆունտ ստեռլինգ, որի նպատակն է ստեղծել միջավայր 2024 թվականին ազատ և արդար ընտրությունների համար և պաշտպանել դրանք արտաքին միջամտությունից։

Միացյալ Թագավորության արտաքին, համագործակցության և զարգացման հարցերով պետքարտուղար Ջեյմս Քլեվերլին մարտի 16-17-ը պաշտոնական այցով կայցելի Վրաստան: