Ճիշտ է, ես այս պաշտոնում առաջին կինն եմ, սակայն վերջինը չեմ լինի, քանի որ յուրաքանչյուր փոքրիկ աղջիկ, ով այսօր ինձ է նայում, տեսնում է, որ սա հնարավորությունների երկիր է,- այս մասին ԱՄՆ-ի նորընտիր փոխնախագահ Քամալա Հարիսը հայտարարել է Վիլմինգթոնում, ընտրություններից հետո առաջին ուղերձի ժամանակ:

«Մեր երկիրը հստակ ուղերձ ունի բոլոր երեխաների համար, անկախ նրանց սեռի ՝ երազեք, ինքնավստահ քայլեր արեք և այնպես տեսեք ձեզ, ինչպես ուրիշները ձեզ չեն տեսնում, քանի որ նրանք դա նախկինում չեն տեսել: Բայց իմացեք, որ մենք ձեր յուրաքանչյուր քայլի համար կծափահարենք»,- հայտարարել է Քամալա Հարիսը:

Հարիսը խոսել է նաև իր մոր մասին, որը 19 տարեկան հասակում Հնդկաստանից ժամանել է ԱՄՆ:

«Երբ մայրս ժամանեց այստեղ, նա հավանաբար չէր պատկերացնում այս պահը, սակայն նա հավատում էր Ամերիկային, որտեղ այսպիսի բան հնարավոր է: Ես մտածում եմ նրա և կանանց մասին, սերունդների, սևամորթ, ասիացի, սպիտակամորթ, լատինամերիկյան և հնդիկ կանանց մասին, ովքեր ճանապարհ են հարթել մեզ համար մեր պատմության ընթացքում մինչև այս երեկո: Կանանց մասին, ովքեր չափազանց շատ են զոհաբերել հանուն հավասարության, ազատության և առաջին հերթին, արդարության համար: Այդ թվում սևամորթ կանայք, որոնք հաճախ անտեսվում են, սակայն վստահեցնում են, որ նրանք մեր ժողովրդավարության հիմնաքարն են:

Այսօր ես մտածում եմ նրանց մարտահրավերների, նպատակասլացության և նրանց տեսլականի մասին, որպեսզի հասկանամ, թե ինչ կարող ենք փոխել արդեն կատարվածով: Ես կանգնած եմ նրանց կողքին»,- հայտարարել է Քամալա Հարիսը:

Նա նաև նշել է, որ փոխնախագահի պաշտոնում իր նշանակումը շատ բան է ասում Ջո Բայդենի անհատականության մասին, ով համարձակություն ունեցավ հատել ամենակարևոր արգելքներից մեկը և իր փոխնախագահ նշանակել կնոջ: