2020 թվականին Վրաստանի տնտեսության աճի կանխատեսումը կկազմի 4,3 տոկոս, գնաճը նպատակային ցուցանիշին կհասնի տարվա վերջին. ԱՄՀ
Արժույթի միջազգային հիմնադրամը (ԱՄՀ) գտնում է, որ 2020 թվականին Վրաստանի տնտեսությունը կաճի 4,3 տոկոսով: Բացի այդ, հիմնադրամի կանխատեսմամբ, գնաճը ծրագրված 3 տոկոսանոց ցուցանիշին կհասնի մինչև տարեվերջ: ԱՄՀ-ն բարձր է գնահատում նաև Վրաստանի ազգային բանկի կողմից դրամավարկային քաղաքականության խստացումը:
ԱՄՀ-ի առաքելությունը, Մերսեդես Վերա Մարտինի գլխավորությամբ, աշխատանքային այցով Վրաստանում էր գտնվում փետրվարի 5-ից 11-ը: Առաքելության նպատակն էր գնահատել երկրի տնտեսությունում և ֆինանսական հատվածում ընթացող գործընթացները և կառուցվածքային բարեփոխումների առաջընթացը:
Վերա Մարտինի խոսքով, Վրաստանի տնտեսական աճը մնում է ամուր: Նախնական գնահատականներով, 2019 թվականին տնտեսական աճը կազմել է 5,2 տոկոս, ինչը բարձր է ԱՄՀ-ի ՝ 4.6 տոկոս կանխատեսումից:
«Վրաստանի տնտեսության 2020 թվականի աճի հեռանկարը կայուն է, իսկ աճի կանխատեսումըկազմում է 4,3 տոկոս: Ռիսկերը հավասարակշռված են 2019 թվականին սպասվող բարձր ակտիվության պատճառով: Նախատեսվում է, որ գնաճը իր 3 տոկոսանոց ցուցանիշին կհասնի մինչև 2020 թվականի ավարտը, խիստ դրամավարկային քաղաքականության պատճառով: ԱՄՀ-ի թիմը ողջունում է կառավարության մտադրությունը ՝ անհրաժեշտության դեպքում պահպանել խիստ դրամավարկային քաղաքականությունը և իրականացնել պատասխանատու ֆիսկալ քաղաքականություն»,- հայտարարել է ԱՄՀ-ի առաքելության ղեկավար Մերսեդես Վերա Մարտինը:
Բացի այդ, հիմնադրամի ղեկավարի գնահատմամբ, արտաքին ցնցումներին դիմացկունությունը մեծացնելու համար, կարևոր է շարունակել կառուցվածքային բարեփոխումները:
Արժույթի միջազգային հիմնադրամի առաքելության ավարտի և Մերսեդես Վերա Մարտինի հայտարարության մասին լրատվությունը տարածել է Վրաստանի ազգային բանկը: