Ռեջեփ Թայիփ Էրդողանի նշած չորս կետերի շուրջ Ռուսաստանի հետ կոնսենսուս չկա. Դմիտրո Կուլեբա
Ռուսաստանի հետ կոնսենսուս չկա Թուրքիայի նախագահ Ռեջեփ Թայիփ Էրդողանի նշած չորս կետերի շուրջ, – այս մասին հայտարարել է Ուկրաինայի արտգործնախարար Դմիտրո Կուլեբան։
Ուկրաինայի արտգործնախարարի խոսքով՝ Ուկրաինայում միակ պետական լեզուն ուկրաիներենն է և կլինի։
«Սխալ է բանակցությունների հիմնական թեմաները դասակարգել չորս կամ ավելի քանակի»,- ասել է Կուլեբան։
Ուկրաինայի արտգործնախարարի խոսքով՝ պատվիրակությունների ենթախմբերում միաժամանակ բազմաթիվ տարբեր հարցեր են քննարկվում, և Ուկրաինան պնդում է, առաջին հերթին, զինադադարի, Ուկրաինայի անվտանգության և տարածքային ամբողջականության երաշխիքների մասին։ Կուլեբան շնորհակալություն է հայտնել թուրքական կողմին և նախագահ Էրդողանին քաղաքական և մարդասիրական օգնության, ինչպես նաև Ուկրաինայի դեմ Ռուսաստանի պատերազմին վերջ տալու դիվանագիտական ջանքերի համար։
«Մենք հուսով ենք, որ Թուրքիան՝ որպես Ուկրաինայի բարեկամ և ռազմավարական գործընկեր, նույնպես կշարունակի աջակցել բոլոր առումներով։ Օգտվեմ առիթից և հիշեցնեմ, որ Ռուսաստանի դեմ նոր պատժամիջոցների սահմանումը և Ուկրաինայի պաշտպանունակության ուժեղացումը ոչ պակաս կարևոր գործոններ են ռուսական ռազմական մեքենան կանգնեցնելու և բանակցություններում ցանկալի առաջընթացի հասնելու համար։ Նման եռաչափ ռազմավարությունը՝ պատժամիջոցներ, ռազմական աջակցություն, բանակցություններ, չպետք է կասկածի տակ դրվի»,- ասել է Կուլեբան։
Թուրքիայի նախագահ Ռեջեփ Թայիփ Էրդողանն այսօր ասել է, որ Ուկրաինան և Ռուսաստանը բանակցությունների ընթացքում փոխըմբռնման են եկել վեցից չորս հարցերի շուրջ։