Զիմբաբվեի զինված ուժերը հայտարարել են, որ գրավել են իշխանությունը և նշել են, որ իրենց գործողությունն ուղղված է նախագահ Ռոբերտ Մուգաբեի շուրջ գտնվող «հանցագործների» դեմ, որոնք երկրի համար սոցիալական և տնտեսական խնդիրներ էին ստեղծում: Զինվորականները հանդես են եկել հայտարարությամբ՝ վստահեցնելով, որ 93-ամյա նախագահը և նրա ընտանիքն ապահով է, հայտնում է Reuters գործակալությունը:

Զինվորականները և զրահապատ մեքենաները մայրաքաղաք Հարարեում արգելափակել են կառավարական շենքեր, խորհրդարան և դատարաններ տանող ճանապարհները:

Գործակալությունը հայտնում է, որ զինվորականները ձերբակալել են ֆինանսների նախարար Իգնատիուս Չոմբոյին, ինչպես նաև հսկողության տակ են վերցրել պետական ZBC հեռուստառադիոընկերությունը:

Հաղորդվում է, որ Մուգաբեն նոյեմբերի սկզբին հեռացրել է իր տեղակալ Էմերսոն Մնանգագվային, ով համարվում էր նրա հնարավոր հետևորդ և վայելում էր զինվորականների աջակցությունը: