Италиа ЕАР аҿы ицәырнагеит Украина аҭынчра ашьақәыргылара иазку 4 пункттәи аплан
Италиа ЕАР аҿы ицәырнагеит Украина аҭынчра ашьақәыргылара иазку 4 пункттәи аплан. Ари атәы аанацҳаит италиатәи аҭыжьымҭа «Ареспублика». Адокумент еиқәдыршәеит Италиа Адәныҟатәи аусқәа рминистрреи атәыла аиҳабыра радминситрациеи.
Апланла иазҧхьагәаҭоуп Украина аҵакырадгьыл аҿы амца аанкылареи, жәларбжьаратәи апартниорцәа рҟны аусеицуреи, лымкаала – Евроеидгылеи, G7, ЕАРи рҟны аусеицура.
Италиа апланла иазҧхьагәаҭоуп акризис алҵшәа иазку 4 етапк, ари апроцесс иацклаҧшуеит Жәларбжьаратәи ацхрааратә гәыҧ.
- Амца аанкылареи ЕАР ахылаҧшрала арратә аиҿагылара ацәаҳәақәа раҧыхреи;
- Евроеидгылашҟа Украина ирласӡаны алалареи НАТО иаламлакәа анеитралтә статус ашьақәыргылареи;
- Донбасси Ҟрыми ирыдҳәаланы Украинеи Урыстәылеи рыбжьара аиқәшаҳаҭхара жәларбжьратәи азхаҵара змоу аҳәаақәа ирыдҳәаланы рҳәатәеиқәымшәара аҭыҧқәҵаразы;
- Европа аҭынчреи ашәарҭадареи иазку аганрацәалатә аиқәшаҳаҭра ҿыц, уи бџьарла аибыҭар ахылаҧшреи аимакқәа рҽацәыхьчареи еиқәнаршәароуп.
Иацы Ниу-Иорк ари аплан цәыригеит Италиа адәныҟатәи аусқәа рминистр Луиџьи Ди Маио. ЕАР амаӡаныҟәгаҩ хада Антонио Гутерриш ари адокумент ирҭахьеит.