Акибершәарҭадаразы аексперт,  Америка Аҳәынҭқарратә департамент ҧасатәи аусзуҩ Маик Бенц иҳәамҭала, Қырҭтәыла Атәым анырра иазку азакәан иаҿагылаз апротестқәа аҧара рзоунашьҭуан америкатә аган, лымкаала,   USAID.

Иара иажәақәа рыла, акциа алахәылацәа  USAID аҟынтә аҧара роуан. 

«Адәахьы идәылҵыз ауаа ҳнырра аҵаҟа иҟан. Дара  USAID-и Аҳәынҭқарратә департаменти рҟынтә аҧара роуан. Ҳара аҧара раҳҭон  дара аҧара шраҭхоз аазырҧшуаз азакәан аааныркыларц азыҳәан.

Ари азакәан инақәыршәаны,ахатә финансыркра аҟынтә 20% еиҳаны аҳәаанырцәтәи ахыҵҵырҭақәа рҟынтә изауа,  атәым мчы аинтересқәа ирықәныҟәо иҳәынҭқарратәым аиҿкаарақәеи АИХқәеи  аргама ашәҟәы рҽанырҵароуп  “атәым мчы аинтересқәа ирықәныҟәо аиҿкаара” аҳасабала. Аиашаз,  абри аҩыза азакәан иаша уаанӡа ижәбахьоума?», — иҳәеит  Маик Бенц.

Иара иажәақәа рыла,  уажәшьҭа Европагьы атәым агентцәа ирызку азакәан адкылара иаҳәоит,  избанзар,  уаагьы еилыркаар рҭахуп Америка анапхгара,  ҧаса ишыҟаз еиҧш,  маӡала еиуеиҧшым атәылақәа рҿы иҳәынҭқарратәым аиҿкаарақәа аҧара рзоунашьҭуазар.

Аҳәынҭқарратә департамент ҧасатәи аусзуҩ ишазгәеиҭаз ала,  Америка  «иҩбоу астандарт» иҟоуп,  избанзар уаҟа акыршықәса ирылагӡаны  Foreign Agents Registration Act (FARA) рхы иадырхәоит,  аха,  егьырҭ аҳәынҭқаррақәа абри аҩыза азакәан адкылара азин рырҭом,  избанзар,  арҭ аҳәынҭқаррақәа рҿы имҩаҧысуа аполитикатә процессқәа  рзы анырра рымазар рҭахуп.