Гуырдзыстоны премьер-министр, Ираклий Къобахидзе ахуырады системæйы реформæйы концепцийыл паддзахадон уæлдæр ахуыргæнæндæтты ректортимæ фæныхас кодта.

Премьер-министры пресс-куыстуаты информацимæ гæсгæ, хицауады сæргълæууæг лæмбынæг фæныхас кодта концепцийы здæхтытыл, кæцыйы нысан у уæлдæр ахуырады гъæд гъæдджынæй фæбæрзонддæр кæнын.

«Ныхас цыд, æндæр хъуыддæгты æхсæн, университетты факультетты дистрибуцийыл, регионалон университетты рæзты æнæмæнгхъæуындзинадыл, ахуырады системæйы децентрализацийыл.

Хицауады сæргълæууæг бахахх кодта, реформæ æххæстæй реализацийы тыххæй ректорты æмæ профессорты цæстæнгас æмæ хъуыдытæ хынцгæйæ ахсджиаг кæй у æмæ банысан кодта, ахæм фембæлдтытæ дарддæр дæр кæй цæудзысты.

Дискусситы фæстиуæгæн ахуырады реформæйы концепци райсдзæн йæ кæронбæттæн формæ æмæ йæ хицауад сбæлвырд кæндзæн.

Хицауады сæрдар æмæ университеты ректорты æхсæн фембæлд фарста-дзуаппы режимы сырæзт. Ректортæ хицауады сæргълæууæгæй райстой дзуаппытæ уыцы фарстатæн, кæцытæ сæ цымыдис кæнынц», -ис фыст Гуырдзыстоны хицауады фидиуæны.

Фембæлдыл Гуырдзыстоны ахуырады, зонады æмæ фæсивæды министр Гиви Микъанадзе, министры хæдивæг Звиад Габисония, хицауады администрацийы къухдариуæггæнæг Леван Жоржолиани æмæ ахуырады реформæйы фарстайыл кусæг уæлдæр ахуырады реформæйы хицауадон къамисы нымæрдар Леван Изория истой.