АИШ-ы  президент Джо Байдены  хæдзары 13  сахатон   джигулы фæстæ, ноджы  æхсæз сусæг документы ссардтой. Уый фæдыл информаци  медиаййæн  базонын кодта  Джо Байдены  адвокат.

Иуæй-иу  документ уыцы  периодмæ  хауы,  Байден  сенатор куы  уыд, æрмæст æндæртæ  йæ  вице-президентæй  уæвыны периодмæ хауынц.  Адвокаты хъусинагæй,   джигулы фæстиуæгæн систой  АИШ-ы президенты къухæй фыст  фиппаинæгтæ æмæ   æрмæджытæ.

Джигулы рæстæджы Байден æмæ йæ бинойнаг  хæдзары нæ уыдысты. Байден  йæхæдæг ратта  уый бар, цæмæй  фæдагурджытæ  Делаверы  уæвæг  йæ  хæдзары баджигул кодаиккой.

Бакой уын кæндзыстæм, уый нæу  фыццаг цау,  Байдены  хæдзары грифимæ сусæг документтæ куы  ссардтой.  Уæдмæ  аналогон  документтæ  ссардæуыд  йæ  раздæры офисы – «Пен Байдены Центры» æмæ афтæдæр  йæ  гаражы. Фæнысангонды  фæдагуырд дарддæр кæны.  Хъуыддагыл снысан ис специалон прокуррор, кæцы инциденты  деталонæй  бацахуыр кæндзæн æмæ сбæрæг кæндзæн,  фехæлдта æви нæ   президент  сусæг документты  бавæрыны фæдл  закъон.

Æаналогон  фæдагуырд   цæуы   раздæры  президент, Дональд   Трампы  ныхмæ дæр,  кæцыйы хæдзары  ивгъуыд азы  афтæдæр  ссардтой  документаци грифимæ сусæг.