İndi biz Ermənistanla sülhə heç vaxt olmadığı kimi daha yaxınıq- bu haqda Azərbaycan Prezidenti İlham Əliyev Bakıda XI Qlobal Forumun açılış mərasimində çıxışı zamanı deyib.

“Cənubi Qafqazın müstəqillik tarixində sülh heç vaxt indiki qədər yaxın olmayıb. Bu, İkinci Qarabağ müharibəsinin nəticəsidir”, – Əliyev bildirib.

Bundan əlavə, Azərbaycanın “Trend” agentliyinin yazdığı kimi, Əliyev çıxışı zamanı qeyd edib ki, Azərbaycanın ərazi bütövlüyü və suverenliyinin bərpası münaqişələrin həlli üçün müsbət nəticələr verəcək.

O bildirib ki, Cənubi Qafqaz regionunda baş verən dəyişikliklər lokal görünə bilər, lakin əslində onların daha geniş nəticələri var, çünki son bir ildə baş verən əsas geosiyasi dəyişiklik Azərbaycanın ərazi bütövlüyü və suverenliyinin tam bərpası olub.

“Bu, həqiqətən də çox ciddi geosiyasi dəyişiklikdir və məncə, həlledilməz görünən münaqişələrin həlli üçün çox müsbət nəticələr verəcək”, – deyə o bildirib.

Bu il Bakı Qlobal Forumunun mövzusu “Parçalanmış dünyanın bərpası”dır.