Եվրոպական հանձնաժողովում հայտարարել են, որ Ռուսաստանի ղեկավարության նկատմամբ սահմանված պատժամիջոցները չեն արգելում Ռուսաստանի նախագահ Վլադիմիր Պուտինին մուտք գործել Եվրոպա։ Այս մասին հայտնել է ԵՄ արտաքին և անվտանգության քաղաքականության հարցերով գլխավոր խոսնակ Անիտա Հիպերը։

«Պուտինն ու Լավրովը ենթարկվում են սառեցված ակտիվների վերաբերյալ պատժամիջոցների, սակայն դա նրանց չի արգելում ճանապարհորդել։ Այսպիսով, այդ սահմանափակումները նրանց վրա չեն տարածվում։ Հանդիպումը դեռ հաստատված չէ, և մենք չենք մեկնաբանի հիպոթետիկ սցենարները, սակայն եթե այն կայանա, փաստացի տվյալներով՝ նրանց մուտքը արգելված չէ», – նշել է Հիպերը։

Հարցին, թե ինչպես կարող է Պուտինը Բուդապեշտ հասնել, հաշվի առնելով, որ ԵՄ-ը փակել է օդային տարածքը ռուսական ինքնաթիռների համար, և արդյոք ԵՄ-ը պետք է բացառություն անի դրա համար, Հիպերը պատասխանել է, որ նման որոշումը կարող են ընդունել ԵՄ անդամ առանձին երկրները։

Հիշեցնենք, որ Հունգարիայի վարչապետ Վիկտոր Օրբանը հեռախոսազրույց է ունեցել Ռուսաստանի նախագահ Վլադիմիր Պուտինի հետ և գրել է, որ Դոնալդ Թրամփի և Վլադիմիր Պուտինի Բուդապեշտում կայանալիք հանդիպման նախապատրաստական աշխատանքներն ընթանում են ամբողջ թափով։ «Հանդիպում տեղի ունեցավ Ռուսաստանի նախագահի հետ։ Պատրաստական աշխատանքները ընթանում են ամբողջ արագությամբ», – գրել է Օրբանը։