Վրաստանի արտաքին գործերի նախարարություն է կանչվել Իրանի դեսպանը – դեսպանին պարզաբանվել է, որ Վրաստանում հավատարմագրված դիվանագիտական ներկայացուցիչները պետք է իրենց գործունեությունն իրականացնեն մանդատի շրջանակներում

2026 թվականի սեպտեմբերի 30-ին, սոցիալական ցանցերում տարածված հայտարարությունների հետ կապված, Վրաստանի արտաքին գործերի նախարարություն է կանչվել Իրանի Իսլամական Հանրապետության արտակարգ և լիազոր դեսպան Սեյեդ Ալի Մոուջանին (Seyed Ali Moujani)։ Տեղեկությունը տարածում է Վրաստանի արտաքին գործերի նախարարությունը։

Գերատեսչության փոխանցմամբ՝ Վրաստանի արտաքին գործերի նախարարի տեղակալ Ալեքսանդրե Խվթիսիաշվիլին Իրանի դեսպանին պարզաբանել է, որ սոցիալական ցանցերում նրա տարածած հայտարարությունները դուրս են գալիս դիվանագիտական գործունեության շրջանակներից։

Նախարարի տեղակալի հայտարարությամբ՝ նման հայտարարությունները բացասաբար են անդրադառնում հասարակական տրամադրությունների վրա։ Նա հույս է հայտնել, որ իրանական կողմը համապատասխան միջոցներ կձեռնարկի, և նման դեպքերը այլևս չեն կրկնվի, որպեսզի վրացական կողմից լրացուցիչ միջոցների ձեռնարկման անհրաժեշտություն չառաջանա։

Ալեքսանդրե Խվթիսիաշվիլին Իրանի դեսպանին նաև պարզաբանել է, որ Վրաստանում հավատարմագրված դիվանագիտական ներկայացուցիչները պետք է իրենց գործունեությունն իրականացնեն դիվանագիտական մանդատի և իրավասությունների շրջանակներում, պահպանեն դիվանագիտական հարաբերությունների հաստատված նորմերը և զերծ մնան հյուրընկալող երկրի պատմության ու ներքին հարցերի մեկնաբանումից։

Ի գիտություն՝ Վրաստանում Իրանի դեսպան Ալի Մոուջանին ֆեյսբուքյան էջում գրառում էր հրապարակել, որտեղ գրում է. «Քեթևան թագուհու պատկերը Թբիլիսիում Իրանի դեսպանատան ճակատին. Այս երեկո Թբիլիսիում Իրանի Իսլամական Հանրապետության դեսպանատան ճակատը լուսավորվել է Քեթևան թագուհու գեղեցիկ և սուրբ պատկերով։ Ինձ համար այս պատկերը կապված չէ միայն պատմական անձնավորության հիշատակի հետ. այն այն պատմական հիշողության սիմվոլն է, որի մասին մինչ օրս բազմաթիվ տարբեր պատմություններ գոյություն ունեն։ Շուտով այս էջի ընթերցողներին կփոխանցեմ իմ անցկացրած նախնական հետազոտության արդյունքները, որոնք վերաբերում են ինչպես Քեթևան թագուհուն, այնպես էլ Իրանում և Վրաստանում պահպանված փաստաթղթերին ու պատմական աղբյուրներին։ Ներկայացված նյութը չի լինի ո՛չ պաշտոնական տարբերակ, ո՛չ էլ հավակնություն, թե Քեթևանի մասին վերջնական խոսքն եմ ասում. սա կլինի պատմաբանի անձնական տեսակետն ու գնահատականը հետազոտության այս փուլում։ Բնականաբար, այս գնահատականը ապագայում պետք է լրացվի, վերլուծվի, քննադատաբար վերանայվի կամ ուղղվի լրացուցիչ աղբյուրների և վրացի ու իրանցի հետազոտողների համատեղ ուսումնասիրությունների հիման վրա։ Հնարավոր է, նման պատմությունների վերաիմաստավորումը, անցյալին վերադառնալուց առավել, այսօր միմյանց ավելի լավ և խորը ճանաչելու հնարավորություն ընձեռի»։