Ուկրաինայի նախագահ Վլադիմիր Զելենսկին արձագանքել է Լեհաստանի վարչապետ Դոնալդ Տուսկի՝ ԱՄՆ-ի հնարավոր ռազմական ներկայության վերաբերյալ հայտարարությանը։ Մասնավորապես, Տուսկը նշել էր, որ ԱՄՆ-ը, հավանաբար, կհամաձայնի զորքեր տեղակայել ռուս-ուկրաինական սահմանին կամ շփման գծում։

Զելենսկին լրագրողների հետ զրույցում չհաստատեց, որ ԱՄՆ-ն արդեն նման պատրաստակամություն է հայտնել, ընդգծելով, որ նման տեղեկատվություն պետք է հրապարակվի հենց ամերիկյան կողմից։

«Բացարձակ անկեղծ ասած, նման բան կարող է հաստատել միայն ԱՄՆ նախագահը։ Սա Ամերիկայի բանակն է, հետևաբար հենց ԱՄՆ-ն է նման որոշումների ընդունողը», – ասաց Զելենսկին։

Միևնույն ժամանակ, նա նշեց, որ այդ հնարավորությունը քննարկվում է, այդ թվում՝ ԱՄՆ նախկին նախագահ Դոնալդ Թրամփի և «կոալիցիայի այլ անդամների» հետ։

«Այո, մենք այդ մասին խոսում ենք՝ թե՛ Թրամփի, թե՛ «կամք ունեցողների կոալիցիայի» ներկայացուցիչների հետ։ Մենք ուզում ենք սա։ Դա շատ ուժեղ քայլ կլինի անվտանգության երաշխիքների շրջանակում», – նշել է Ուկրաինայի նախագահը։

Նա նաև հայտնեց, որ ԱՄՆ-ը խոստացել է աջակցություն օդային պաշտպանության համակարգերի մասով։ Զելենսկու խոսքով՝ Թրամփի հետ հանդիպման ժամանակ քննարկվել է Ուկրաինայի հակաօդային պաշտպանությունը։

«Ես չափազանց շատ կարիք ունեմ օդային պաշտպանության։ Անհրաժեշտություն ունեմ NASAMS հրթիռների, նաև PAC-3 հրթիռների՝ «Պատրիոտ» համակարգերի համար։ Չեմ ցանկանում հրապարակավ բացահայտել մանրամասները, բայց ես դա ցույց տվեցի ամերիկյան կողմին», – նշել է Զելենսկին։

Նա հավելել է, որ Թրամփը խոստացել է աջակցել այդ ուղղությամբ, և որ Ուկրաինան պատրաստ է անհրաժեշտ համակարգերը գնել PURL ծրագրի շրջանակում։

Վերջում Զելենսկին ընդգծել է, որ նման աջակցությունն անհրաժեշտ է նույնիսկ այն դեպքում, եթե դիվանագիտական ջանքերը պատերազմը ավարտելու համար շարունակվում են, քանի որ Ռուսաստանը չի դադարեցնում իր հարվածները։