Վերջին 24 ժամվա ընթացքում իսրայելական տանկերը մտել են Ղազա քաղաքի մի քանի շրջաններ։

Ինչպես գրում է «Սի Էն Էն»-ը, հեռուստաընկերության լրագրողները, որոնք այժմ գտնվում են Ղազայի հատվածում, հաղորդում են ծանր հրետակոծությունների և պայթյունների մասին։

Նրանց խոսքով՝ աշխարհագրական դիրքի պատկերները ցույց են տալիս, որ իսրայելական տանկերը ներկայումս գտնվում են Ղազա քաղաքից արևմուտք գտնվող Ալ-Շատի փախստականների ճամբարի տարածքում։

Բացի այդ, Ղազայում մնացած պատանդների ընտանիքները նշում են, որ գործողությունը նրանց ավելի մեծ վտանգի տակ է դնում։ Նրանց խոսքով՝ մինչև 20 պատանդ, հավանաբար, դեռ կենդանի են և կարող են մահանալ իսրայելական գործողության ընթացքում։

Տեղեկատվության համար՝ սեպտեմբերի սկզբին իսրայելական զինվորականները հրամայել են Ղազա քաղաքի բնակիչներին և ներքին տեղահանված անձանց լքել քաղաքը և տեղափոխվել հատվածի հարավային մասը։ Այդ ժամանակ քաղաքում գտնվում էր մոտ մեկ միլիոն մարդ։ Իսրայելի զինվորականները երեքշաբթի օրը The Times-ին հայտնել են, որ այդ ժամանակվանից ի վեր Ղազան լքել է 640,000 մարդ։ Իսրայելի կառավարությունը հայտարարում է, որ իրենց նպատակը Համասի լիակատար ոչնչացումն է։