Ճապոնացի գործարար Սատորու Անզակին, որին ախտորոշել են քաղցկեղի վերջին աստիճանը, հսկայական հրաժեշտի երեկույթ է կազմակերպել, որին հրավիրվել է առնվազն 1000 մարդ:
Տոնակատարությունը տեղի է ունեցել երկուշաբթի: Հրավիրյալների թվում են եղել Անզակիի ընտանիքի անդամները, ընկերները, դասընկերներն ու համակուրսեցիները, գործընկերները, իր ղեկավարած ընկերության աշխատակիցները:
Սատորու Անզակին վեց տարի եղել է Komatsu մեքենաշինական հսկայի նախագահը: Այս տարվա հոկտեմբերին 80-ամյա գործարարի մոտ լեղապարկի քաղցկեղ է հայտնաբերվել:
«Ես միանգամայն բավարարված եմ, որ կարողացա հրաժեշտ տալ այն մարդկանց, որոնց հետ շփվել եմ կյանքում»,- լրագրողներին հայտարարել է Անզակին:
Ինչպես նշում են ճապոնական լրատվամիջոցները, գործարարը երեկույթի ընթացքում շրջել է հյուրերի մեջ և սեղմել նրանց ձեռքերը՝ շնորհակալություն հայտնելով յուրաքանչյուրին:
